“E.S.” mas’uliyati cheklangan jamiyatining davlat xaridlari bo‘yicha o‘tkazilgan tanlov natijalaridan norozi bo‘lib yo‘llagan murojaati Korrupsiyaga qarshi kurashish agentligi tomonidan o‘rganildi.

Aniqlanishicha, 2020-yil 30-oktabr kuni “dxarid.uzex.uz” portalida Toshkent viloyatidagi shaharlardan biridagi Bolalar-o‘smirlar sport maktabiga 800 mln. so‘mlik 27 ta turdagi sport inventarlari sotib olish uchun tanlov e’lon qilingan.

Mazkur e’lon bo‘yicha “J.S.”, “A.”, “M.S.”, “E.S.” nomli MCHJlar jami 4 nafar talabgorlar o‘z takliflarini kiritgan bo‘lib, 2020-yil 11-noyabr kuni xarid komissiyasi tomonidan tanlov o‘tkazilgan va “A.” MCHJ tomonidan berilgan 775,7 mln. so‘mlik taklif ma’qullangan.

O‘rganishlar jarayonida mazkur tanlov o‘tkazilishida bir qator qonunbuzilishi holatlariga yo‘l qo‘yilganligi aniqlandi.

Jumladan, “Davlat xaridlari to‘g‘risida”gi Qonunning 55-moddasida, e’londa tanlovni o‘tkazish vaqti sifatida ko‘rsatilgan vaqtda xarid komissiyasi tanlov ishtirokchilari tomonidan berilgan takliflar solingan konvertlarni takliflarni baholash uchun ochishi, tanlov ishtirokchisining vakolatli vakili konvertlarni ochish tartib-taomili chog‘ida hozir bo‘lishga haqli ekanli ko‘rsatilgan.

Biroq, tanlov ishtirokchisining vakili tanlovda shaxsan qatnashishi shartligi va ishtirok etmaslik tanlovdan chetlatishga asos bo‘lishi belgilangan bo‘lmasada, xarid komissiyasi tomonidan “E.S.” MCHJning taklifi asossiz ravishda ko‘rib chiqilmagan.

Shuningdek, “Davlat xaridlari to‘g‘risida”gi Qonunning 55-moddasida, takliflarni ko‘rib chiqish va baholash bayonnomasida takliflari ularni rad etishning aniq sabablari ko‘rsatilgan holda rad etilgan tanlov ishtirokchilari haqidagi ma’lumotlar ko‘rsatilishi belgilangan.

Lekin, takliflarni ko‘rib chiqish va baholash bayonnomasida “J.S.”, “M.S.” MCHJlarining tijorat takliflarini rad etilish, “E.S.” MCHJ tanlovdan chetlashtirilish sabablari ko‘rsatilmagan.

Bundan tashqari, O‘zbekiston Respublikasi Prezidenti huzuridagi Loyiha boshqaruvi milliy agentligining 2018-yil 15-maydagi buyrug‘i bilan tasdiqlangan “Xarid qilish tartib-taomillarini tashkil etish va o‘tkazish tartibi to‘g‘risida”gi Nizomning 49-bandida, buyurtmachi tanlovni o‘tkazish uchun toq sonli a’zolardan (kamida beshta kishidan) iborat xarid komissiyasini tuzishi belgilangan bo‘lsada, xarid komissiyasi raisi va 5 nafar a’zolardan iborat holatda jami 6 nafar juft tarkibda shakllantirilgan.

“E.S.” MCHJ tomonidan tanlov berilgan taklif 596 mln. so‘m bo‘lib, tanlovda g‘olib bo‘lgan “A.” MCHJ taklifidan (775 mln. so‘m) 179 mln. so‘m arzon hisoblanadi.

Shunga ko‘ra, murojaat bo‘yicha to‘plangan hujjatlar qonuniy qaror qabul qilish uchun O‘zbekiston Respublikasi Bosh prokuraturasiga yuborildi. Natijada Toshkent viloyat prokuraturasi tomonidan 2021-yil 5-aprel kuni Jinoyat kodeksining 167-moddasi 3-qismi “a” bandi bilan jinoyat ishi qo‘zg‘atilgan.

Izoh: xarid bo‘yicha tanlovda ishtirok etgan korxona nomlari (jinoyat ishi yakunlanmaganligi sababli) o‘zgartirilgan va qisqartirilgan holda keltirilmoqda.