“Тошкент марказида маъмурий бинони реконструкция қилиш ва автотураргоҳ қуришга 431,5 млрд. сўм сарфланади” номли мақола “gazeta.uz” нашрида эълон қилинган.

Коррупцияга қарши курашиш агентлиги томонидан қурилиш, давлат харидлари, соғлиқни сақлаш ва бошқа коррупция хавфи юқори бўлган соҳаларда доимий равишда манфаатлар тўқнашуви ҳолатлари мониторинги олиб борилмоқда.

Жумладан, 2021 йилда Андижон, Жиззах, Хоразм ва Навоий вилоятларида ўрганишлар ўтказилгани ҳолда аниқланган қонун бузилишлар, уларнинг келиб чиқиш сабаблари ва бунга имконият яратиб бераётган шарт-шароитларни бартараф этиш тўғрисида вилоят ҳокимликларига тақдимномалар киритилди.

Ўрганиш натижалари кўрсатишича амалдаги қонунчиликда манфаатлар тўқнашуви норматив-ҳуқуқий жиҳатдан тўлиқ тартибга солинмаганлиги, ҳуқуқий бўшлиқлар мавжудлиги, жавобгарлик масалалари белгиланмаганлиги ушбу ҳолатларнинг ҳанузгача сақланиб қолишига асосий омиллардан бўлиб қолмоқда.

Шунга кўра, хозирда Агентлик томонидан манфаатлар тўқнашувига доир масалалар юзасидан қонунчиликка тегишли ўзгартиришлар киритиш бўйича таклифлар тайёрланмоқда.