Куни кеча агентлик масъул ходимларининг халқаро эксперт, Россия иқтисодиёт олий мактабининг Аксилкоррупция маркази директори А.Конов билан онлайн учрашуви бўлиб ўтди.

Маъулмот учун: Халқаро эксперт 2021 йилда Агентлик ҳамда Бирлашган Миллатлар Ташкилотининг Гиёҳванд моддалар ва жиноятчилик бўйича бошқармасининг (БМТ ГЖБ) Марказий Осиёдаги минтақавий ваколатхонаси ҳамкорликда амалга оширадиган тадбирлар режасига асосан жалб этилди. 

Мазкур йиғилиш Ўзбекистон Республикаси Президентининг 2020 йил 30 октябрдаги ПФ-6098-сон Фармони билан тасдиқланган Яширин иқтисодиёт ва коррупцияга қарши курашишда вазирлик ва идораларнинг фаолият самарадорлигини оширишга қаратилган чора-тадбирларни амалга ошириш ҳамда солиқ ва божхона маъмуриятчилигини такомиллаштириш бўйича “Йўл харита”си ижросини таъминлаш масаласида ташкил этилди. 
 

Учрашувда йўл харитасида Коррупцияга қарши курашиш агентлиги ва Иқтисодий тараққиёт ва камбағалликни қисқартириш вазирлигига белгиланган молиялаштиришнинг марказлаштирилган манбалари ҳисобига амалга оширилаётган инвестиция лойиҳаларини мажбурий равишда коррупцияга қарши экспертизадан ўтказиш тартибини жорий қилиш вазифасини амалга ошириш механизмлари тўғрисида фикр алмашилди.

Мулоқот давомида Агентлик ва вазирлик масъул ходимларидан иборат гуруҳ халқаро эксперт билан ҳамкорликда юқорида қайд этилган тартиб лойиҳасини ишлаб чиқиш бўйича фикр алмашишди. Ҳар бир томон учун  ушбу тартибни ишлаб чиқиш юзасидан вазифалар белгиланди. Жумладан, халқаро тажрибани ўрганган ҳолда, Ўзбекистон шароитида ушбу тажрибани қўллаш ва татбик этиш бўйича таклифлар ишлаб чиқишга келишиб олинди.