Ўзбекистон Республикаси Коррупцияга қарши курашиш агентлиги томонидан соғлиқни сақлаш тизимида “Коррупциясиз соҳа” лойиҳасининг самарали ижросини таъминлаш мақсадида Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги ва унинг таркибий тузилмаси ҳисобланувчи “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУКда бюджет маблағларининг фойдаланилиши, қонун ҳужжатларига риоя этилиши ҳолатлари ва тизимда юзага келиши мумкин бўлган коррупциявий хавф-хатарларни олдини олиш масалалари бўйича ўрганиш ўтказилди.

Ўрганишда, ташкилот мансабдор шахслари ва ходимлари томонидан  бюджет маблағларининг мақсадсиз сарф қилиниши,  ўзлаштириш ва талон-торож қилиш ҳолатлари, аслида ишламаган ходимлар учун ойлик иш ҳақлари тўлаб келиниши, бюджетга солиқларнинг тўланмаганлиги, давлат харидлари жараёнлари ўтказилиши, шунингдек, бир қатор дори воситалари ва тиббий буюмлар сифатида эътироф этилмайдиган препаратларни норматив талабларга зид равишда дори воситасида давлат рўйхатидан ўтказилганлиги каби қатор қонун бузилиши ҳолатлари аниқланди.

 Ўрганиш якуни бўйича Фармацевтика тармоғини ривожлантириш агентлиги ва унинг таркибий тузилмасида  жами 19 млрд. 409 млн. 889 минг сўмлик жуда кўп миқдордаги молиявий хато ва камчиликлар мавжудлиги ва бюджет маблағларини сарф қилинишида белгиланган талабларнинг қўпол равишда бузилганлик ҳолатлари аниқланди.

Мавжуд аниқланган ҳолатлар юзасидан тўпланган ҳужжатлар ҳуқуқни муҳофаза қилувчи органларга тақдим этилди.

Шунга мувофиқ, Агентлик томонидан тақдим этилган ҳужжатлар асосида Фармацевтика тармоғини ривожлантириш агентлиги ва “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУКнинг мансабдор шахсларига нисбатан Ўзбекистон Республикаси Жиноят кодексининг 167-моддаси  3-қисми   “а” банди, 205-моддаси 2-қисми “а” банди, 184-моддаси 3-қисми билан жиноят иши қўзғатилди.

Ҳозирда, мазкур ҳолат юзасидан дастлабки тергов ҳаракатлари олиб борилмоқда.