Жорий йилнинг 25 майдан буён ҳудудларда давом этаётган семинарларнинг навбатдагилари бугун ҳам бир қатор вилоятларда ташкил этилди.

Навоий, Сурхондарё, Наманган вилоятларида коррупцияга қарши курашиш, унинг олдини олиш ва бу борадаги давлат сиёсатининг мазмун-моҳияти тўғрисидаги амалий семинарлар бўлиб ўтди. Ўзбекистон Республикаси Коррупцияга қарши курашиш агентлиги томонидан тузилган ишчи гуруҳ аъзолари ҳам иштирок этишди.
 

Семинарда таъкидланганидек, “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги  Фармоннинг қабул қилиниши республикамизда коррупциянинг олдини олиш ва унга қарши курашиш ҳамда барча соҳаларда коррупцион омилларга чек қўйишга қаратилган кенг кўламли ислоҳотларни янги босқичга кўтарилишига асос бўлиб хизмат қилмоқда.

Коррупциявий жиноят асосан давлат хизматчиси томонидан содир этилиши боис, унинг ўзига хос сабабларидан бири, давлат хизматида ишлаётган баъзи мансабдор шахсларнинг маънавий қашшоқлигидир. Маънавий қашшоқ инсон доимо моддий ҳолатини яхшилаш илинжида бўлади.

Шундан келиб чиққан ҳолда, коррупцияга қарши курашиш самарадорлигини ошириш, унинг олдини олишда превентив чораларни кучайтириш мақсадида бир қатор муҳим ислоҳотлар амалга оширилди.
 

Давлат органларида коррупция ҳолатлари ва манфаатлар тўқнашувининг олдини олиш мақсадида қонун билан тартибга солинадиган Давлат хизматчиларининг одоб-аҳлоқ кодекси ишлаб чиқилади ва унда давлат хизматчилари учун чекловларнинг аниқ рўйхати белгиланади.

Семинарда шу ва бошқа масалалар атрофлича муҳокама этилди.