Жорий йилнинг 29 июнь куни Коррупцияга қарши курашиш агентлиги раҳбарияти иштирокида Ўзбекистон Республикаси Президентининг “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги Фармони ҳамда “Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида”ги қарори лойиҳалари ҳамда улар бўйича жамоатчиликдан келиб тушган таклифларни муҳокама қилиш мақсадида давра суҳбати ўтказилди.

Тадбирда коррупцияга қарши курашиш борасида таклиф этилаётган чора-тадбирлар, жумладан коррупцияга оид жиноятларни содир этишда айбдор деб топилган шахсларнинг очиқ электрон реестрини юритиш ва уларга нисбатан бир қатор чекловлар ўрнатиш, давлат хизматчилари ва уларнинг оила аъзолари учун даромадлар ва мол-мулкни мажбурий декларация қилиш тизимини жорий этиш, кадрлар билан ишлаш тизимини такомиллаштириш, ушбу жиноятлар учун жавобгарликни кучайтириш механизмлари бўйича батафсил тушунтиришлар берилди.

Давра суҳбатида 2021–2022 йилларга мўлжалланган коррупцияга қарши курашиш бўйича давлат дастури лойиҳаси ҳам муҳокама қилинди.

Йиғилишда сўзга чиққан Коррупцияга қарши курашиш агентлиги директори ўринбосари Умида Тухташева қуйидагиларни таъкидлаб ўтди.

- Мазкур ҳужжатлар лойиҳаларини ишлаб чиқишда асосий эътибор коррупция ҳолатини келтириб чиқарувчи омилларни аниқлаш бўйича ўтказилган ўрганишлар, коррупциявий жиноятлар таҳлили, сўнгги йилларда халқимиз, журналист, блогерлар томонидан кўтарилган масалалар, таклифлар ҳамда халқаро конвенция ва бошқа норматив-ҳужжатларга қаратилди. 

Бундан ташқари 2021-2022 йилларда коррупцияга қарши курашиш бўйича давлат дастурида ҳам бир қатор муҳим масалалалар акс эттирилган. Аввало ушбу дастурга фармон ва қарорда белгиланган энг муҳим йўналишлар ҳамда уларнинг ижро этиш механизмлари келтириб ўтилган.

Яна бир аҳамиятли жиҳати, дастурда белгиланган вазифалар асосан, превентив чоралар яъни коррупцияни олдини олишга қаратилган йўналишлар эканлиги билан диққатга сазовар. Белгиланган асосий йўналишларнинг ўзиёқ дастур мазмун-моҳияти ҳақида етарли тасаввур бера олади.

Шунингдек, тадбирда Ўзбекистон Республикаси Президентининг коррупцияга оид фармон ва қарори лойиҳалари бўйича ўтказилган жамоатчилик муҳокамаси натижалари эълон қилинди. Таъкидланишича, жамоатчиликдан ҳозирга қадар фармон лойиҳаси бўйича 152 та ва қарор лойиҳаси бўйича 63 та, жами 215 та таклифлар келиб тушган. Уларнинг аксарияти инобатга олиниб, фармон ва қарор лойҳалари ҳамда давлат дастурига киритилди.