Жорий йилнинг 30 июнь куни Коррупцияга қарши курашиш агентлиги ҳамда Молдова Республикаси Коррупцияга қарши курашиш миллий маркази раҳбарлари иштирокида онлайн учрашув ташкил этилди.

Маълумот учун: Миллий коррупцияга қарши кураш маркази коррупциянинг олдини олиш ҳамда мамлакатдаги коррупциявий ҳолатни назорат қилиб борувчи орган ҳисобланади. Ташкилот 2012 йилда ташкил этилган. Марказ коррупцияга қарши курашишда превентив чораларни қўллаш учун масъулдир.

Тадбирда ўзаро ҳамкорлик алоқаларини йўлга қўйиш, тажриба алмашиш, коррупцияга қарши курашиш борасидаги илғор амалиётларни қўллаш масалалари муҳокама этилди.

Тадбир аввалида Коррупцияга қарши курашиш агентлиги директори А.Бурханов томонидан мамлакатимизда олиб борилаётган ислоҳотлар, агентлик вазифа ва функциялари, ишлаб чиқилаётган норматив-ҳуқуқий ҳужжатлар, очиқлик ва ошкораликни таъминлаш, жамоатчилик фаоллигини ошириш бўйича амалга оширилаётган ишлар тўғрисида маълумот берилди.
 

Шундан сўнг Молдова Республикаси Коррупцияга қарши курашиш миллий маркази директори Руслан Флоча учрашувда Марказнинг ахборот таҳлилий фаолияти, давлат хизматчиларини коррупцияга қарши ўқитиш тизими каби масалалар тўғрисида маълумот берди.

Шу билан бирга маърузада норматив-ҳуқуқий ҳужжатларни  коррупцияга қарши экспертизадан ўтказиш бўйича Молдова тажрибаси, ушбу жараённинг ташкил этилиши, қонунчилик асослари, экспертиза суъектларининг вазифа ва функцияларига тўхталиб ўтилди.

Бундан ташқари аҳолини, хусусан ёшларни коррупцияга қарши курашишга жалб этиш бўйича бир нечта интерактив усуллар орқали ҳамда марказ ҳузурида волонтёрлик гуруҳлари шакллантирилган бўлиб аҳоли орасида тарғибот-ташвиқот фаолиятини олиб боришда фаоллик кўрсатиши қайд этилди.

Учрашув якунида тажриба алмашиш мақсадида тизимли қўшма семинар ва тренинглар ташкил этиш, ҳамкорликнинг ҳуқуқий асосларини шакллантириш, ҳамда ўзаро ташрифларни амалга ошириш бўйича келишувга эришилди.