Европада хавфсизлик ва ҳамкорлик ташкилоти Агентлик доимий ҳамкорларидан бири ҳисобланади. Коррупцияга қарши курашиш бўйича норматив-ҳуқуқий ҳужжатлар лойиҳаларини такомиллаштиришда, халкаро экспертлар иштирокидаги тадбирлар ва бошқа масалаларда ЕХҲТ Агентлик билан яқиндан ҳамкорлик қилиб келмоқда.

Икки томонлама ҳамкорлик доирасини кенгайтириш мақсадида жорий йилнинг 5 июль куни Агентлик директори Акмал Бурханов ҳамда Европада хавфсизлик ва ҳамкорлик ташкилотининг Ўзбекистондаги элчиси Пьер фон Аркс ўртасида учрашув бўлиб ўтди.

Учрашув давомида элчи Пьер фон Аркс томонидан Ўзбекистонда коррупцияга қарши курашишда олиб борилаётган кенг кўламли ишлар мамнуният билан эътироф этилиб, ЕХҲТ бу борада ҳар томонлама ҳамкорликка тайёр эканлиги таъкидлади.

Шунингдек, томонлар мамлакатимизда бизнес халолликни, давлат органлари ва ташкилотлари фаолиятининг очиқлик ва шаффофлигини таъминлаш, шунингдек, коррупция ҳақида хабар берган шахсларнинг ҳуқуқларини ҳимоя қилиш ва бошқа соҳаларда ҳамкорликни йўлга қўйишга эътибор қаратди.

Учрашув якунида Агентлик ва ЕХҲТ ҳамкорлигида 2021 йилда амалга ошириладиган Чора-тадбирлар режаси имзоланди.