Аввал хабар берганимиздек, жойларда Коррупцияга қарши курашиш агентлиги масъул ходимлари иштирокида семинарлар ҳамда ўрганишлар ташкил этилмоқда.

Хусусан, жорий йилнинг 15 июль куни Хоразм вилоятида Коррупцияга қарши курашиш агентлиги директори ўринбосари Т.Ҳайдаров иштирокида вилоятдаги ташкилотлар масъул ходимлари учун семинар ташкил этилди.

Унда Давлатимиз Раҳбарининг “Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида”ги ПФ-6247-сон Фармони мазмун-моҳиятига тўхталиб ўтилди. Хусусан, мазкур фармон билан белгиланган янги талаблар, шу жумладан давлат органлари ва ташкилотлари томонидан очиқ маълумотлар сифатида ижтимоий аҳамиятга молик маълумотларни жойлаштириш ҳақида сўз борди.

Таъкидланганидек, Фармонга мувофиқ, давлат органлари ва ташкилотлари ҳар йили 1 мартга қадар ўз фаолиятига оид ҳисоботни расмий веб-сайтларига жойлаштириб, 10 мартга қадар уни кенг жамоатчилик иштирокида муҳокама қилиш жойи ва вақти ҳақида хабар беради.

Ушбу ўзгаришлар бир томондан давлат органларининг шаффофлигини оширса, иккинчи томондан ислоҳотлар жараёнига аҳолини фаол жалб этиш, улар иштирокини таъминлашга хизмат қилиши қайд этилди.