Avval xabar berganimizdek, joylarda Korrupsiyaga qarshi kurashish agentligi mas’ul xodimlari ishtirokida seminarlar hamda o‘rganishlar tashkil etilmoqda.
Xususan, joriy yilning 15 iyul kuni Xorazm viloyatida Korrupsiyaga qarshi kurashish agentligi direktori o‘rinbosari T.Haydarov ishtirokida viloyatdagi tashkilotlar mas’ul xodimlari uchun seminar tashkil etildi. 
 

Unda Davlatimiz Rahbarining “Davlat organlari va tashkilotlarining faoliyati ochiqligini ta’minlash, shuningdek, jamoatchilik nazoratini samarali amalga oshirishga doir qo‘shimcha chora-tadbirlar to‘g‘risida”gi PF-6247-son Farmoni mazmun-mohiyatiga to‘xtalib o‘tildi. Xususan, mazkur farmon bilan belgilangan yangi talablar, shu jumladan davlat organlari va tashkilotlari tomonidan ochiq ma’lumotlar sifatida ijtimoiy ahamiyatga molik ma’lumotlarni joylashtirish haqida so‘z bordi. 

Ta’kidlanganidek, Farmonga muvofiq, davlat organlari va tashkilotlari har yili 1 martga qadar o‘z faoliyatiga oid hisobotni rasmiy veb-saytlariga joylashtirib, 10 martga qadar uni keng jamoatchilik ishtirokida muhokama qilish joyi va vaqti haqida xabar beradi.
Ushbu o‘zgarishlar bir tomondan davlat organlarining shaffofligini oshirsa, ikkinchi tomondan islohotlar jarayoniga aholini faol jalb etish, ular ishtirokini ta’minlashga xizmat qilishi qayd etildi.