Давлатимиз раҳбари ташаббуси билан аҳоли фаровонлигини таъминлаш ва яшаш шароитини яхшилашга оид қатор меъёрий ҳужжатлар, қарорлар, дастурлар ҳаётга изчил татбиқ этилмоқда. Жумладан, “Обод қишлоқ” ва “Обод маҳалла” давлат дастурлари орқали Андижон вилоятининг қишлоқ ҳамда шаҳарчаларидаги муҳандислик-коммуникация тармоқлари, ижтимоий соҳа объектлари, йўл-транспорт ва бозор инфратузилмаси ривожлантирилиб, аҳолининг турмуш даражаси янада яхшиланмоқда.

Ўзбекистон Республикаси Коррупцияга қарши курашиш агентлиги ишчи гуруҳи аъзолари, вилоят ва туман ҳокимлиги масъуллари ҳамда “Ягона буюртмачи хизмати” инжиниринг компанияси ходимлари ҳамкорлигида вилоятнинг Андижон шаҳар, Андижон ва Избоскан туманларида дастур юзасидан амалга оширилаётган ишлар кўздан кечирилди. Агентлик ходимлари ҳудудлардаги ички йўллар ва ижтимоий объектларнинг таъмирлаш ишлари қай тарзда  олиб борилаётгани, бозор инфратузилмаси объектлари ва замонавий хизмат кўрсатиш шахобчаларининг ҳолати билан танишишди.

Ўрганишдан асосий мақсад давлат дастури доирасида амалга оширилаётган ишлар, янги қурилаётган ва таъмирланаётган ижтимоий соҳа объектларини кузатиш, мавжуд муаммоларни аниқлаш ҳамда бартараф этишдир. Айтиш жоизки, вилоятда 2021 йилги “Обод қишлоқ” ва “Обод маҳалла” дастурлари доирасида жами 37 та ижтимоий соҳа объектларини таъмирлаш ва жорий таъмирлаш, 67,2 км масофага асфальт ва бетон ётқизиш (191,8 қум-шағал ётқизиш) ҳамда 275,2 км ичимлик суви таъминоти ва оқова сув тизимини таъмирлаш кўзда тутилган бўлиб, мазкур соҳаларда бажарилаётган ишлар одамларнинг ҳаётдан мамнун яшашига замин яратмоқда.