Davlatimiz rahbari tashabbusi bilan aholi farovonligini ta’minlash va yashash sharoitini yaxshilashga oid qator me’yoriy hujjatlar, qarorlar, dasturlar hayotga izchil tatbiq etilmoqda. Jumladan, “Obod qishloq” va “Obod mahalla” davlat dasturlari orqali Andijon viloyatining qishloq hamda shaharchalaridagi muhandislik-kommunikatsiya tarmoqlari, ijtimoiy soha obyektlari, yo‘l-transport va bozor infratuzilmasi rivojlantirilib, aholining turmush darajasi yanada yaxshilanmoqda.

O‘zbekiston Respublikasi Korrupsiyaga qarshi kurashish agentligi ishchi guruhi a’zolari, viloyat va tuman hokimligi mas’ullari hamda “Yagona buyurtmachi xizmati” injiniring kompaniyasi xodimlari hamkorligida viloyatning Andijon shahar, Andijon va Izboskan tumanlarida dastur yuzasidan amalga oshirilayotgan ishlar ko‘zdan kechirildi. Agentlik xodimlari hududlardagi ichki yo‘llar va ijtimoiy obyektlarning ta’mirlash ishlari qay tarzda  olib borilayotgani, bozor infratuzilmasi obyektlari va zamonaviy xizmat ko‘rsatish shaxobchalarining holati bilan tanishishdi.

O‘rganishdan asosiy maqsad davlat dasturi doirasida amalga oshirilayotgan ishlar, yangi qurilayotgan va ta’mirlanayotgan ijtimoiy soha obyektlarini kuzatish, mavjud muammolarni aniqlash hamda bartaraf etishdir. Aytish joizki, viloyatda 2021 yilgi “Obod qishloq” va “Obod mahalla” dasturlari doirasida jami 37 ta ijtimoiy soha obyektlarini ta’mirlash va joriy ta’mirlash, 67,2 km masofaga asfalt va beton yotqizish (191,8 qum-shag‘al yotqizish) hamda 275,2 km ichimlik suvi ta’minoti va oqova suv tizimini ta’mirlash ko‘zda tutilgan bo‘lib, mazkur sohalarda bajarilayotgan ishlar odamlarning hayotdan mamnun yashashiga zamin yaratmoqda.