Аввал хабар қилганимиздек, Коррупцияга қарши курашиш агентлиги делегацияси Словенияда амалий ташриф билан бўлиб турибди. Ташриф дастурига асосан Словения ахборот комиссияси вакиллари билан учрашув бўлиб ўтди.

Коррупцияга қарши курашиш агентлиги директори Акмал Бурханов Ўзбекистонда давлат ҳокимияти ва бошқаруви органлари фаолиятининг очиқлигини таъминлаш, ахборот олишнинг аниқ механизмларини жорий этиш бўйича ишлар олиб борилаётганини таъкидлади. Жумладан, агентликка ушбу йўналишда қатор вазифалар юклатилганини кўрсатиб ўтди.

Словения ахборот комиссияси вакиллари мамлакатда фуқароларнинг ахборот олиш кафолатларини таъминлаш бўйича яратилган механизмлар ҳақида батафсил маълумот берди. Жумладан, Словения қонунчилигида ахборот тушунчаси, ахборот олиш учун сўров юбориш механизми, ахборотни тақдим этиш турлари, сўровни кўриб чиқиш муддати, уни рад этиш тартиби, ахборот комиссиясига шикоят билан мурожаат қилиш, ахборотни тақдим этмаганлик учун жавобгарлик, шикоятларни судда кўриб чиқиш амалиёти ҳақида сўзлаб берилди. 

Мулоқотда, айниқса, қонунчиликни амалиётда қўллашдаги муаммо ва камчиликлар, тажрибалар ҳақида фикр алмашилди. 

Коррупцияга қарши курашиш агентлиги делегацияси, шунингдек, Словения Transparency International ташкилоти вакиллари билан учрашув ўтказди. А. Бурханов Ўзбекистон коррупцияга қарши курашишда халқаро ҳамкорликка алоҳида эътибор қаратилаётганини қайд этиб ўтди. Бундан ташқари, коррупцияга қарши курашишда муросасизлик муҳитини яратиш мақсадида фуқаролик жамияти институтлари билан ҳамкорликда ишлаш, ушбу йўналишда фаолият юритадиган нодавлат ташкилотларни қўллаб-қувватлаш агентликнинг истиқболдаги фаолиятининг асосий йўналишларидан бири бўлиб қолиши таъкидланди.

Словения Transparency International ташкилоти вакиллари Словения коррупциянинг олдини олиш комиссияси ва бошқа давлат органлари билан ҳамкорлик механизмлари, ахборот алмашиш, коррупция ҳолатларини очиқлашда иштирок этаётган шахсларни ҳуқуқий ҳимоя қилиш, коррупцияга оид сўровлар, тадқиқотлар ўтказиш, ўқув-методик қўллаб-қувватлаш, кадрлар салоҳиятини ошириш борасидаги тажрибаси, ташкилотнинг жамоатчилик назоратини амалга оширишдаги ўрни ҳақида атрофлича сўзлаб беришди.

Учрашувда коррупциянинг олдини олиш, давлат хизматчиларининг ҳуқуқий маданиятини ошириш мақсадида ўзаро тажриба алмашиш, ўқув-машғулотларини ўтказиш, ўқув-методик қўлланмалар ишлаб чиқишда ҳамкорлик қилишга келишиб олинди.