Агентлик делегациясининг Йожеф Штефани номидаги институт раҳбарияти билан учрашувида замонавий ахборот коммуникация технологиялари, айниқса, сунъий интеллектдан коррупцияга қарши курашиш, жамоатчилик назоратининг таъсирчан механизмларини йўлга қўйишда амалий ҳамкорлик қилиш масаласи муҳокама этилди. 

Маълумот учун айтиш керакки, Йожеф Штефани номидаги институт Европанинг сунъий интеллект соҳасидаги етакчи илмий-тадқиқот марказларидан бўлиб, бу ерда 1100 дан ортиқ олимлар изланиш олиб боради. Институт Microsoft, Bloomberg сингари дунёнинг илғор компанияларига ўз маҳсулотларини етказиб беради. Хусусан, институт олимлари томонидан яратилган сунъий интеллект алгоритми ёрдамида бугунги Словенияда муваффақиятли фаолият юритаётган, коррупциявий омилларни олдини олишга қаратилган ERAR порталининг асоси яратилган.

Агентлик ва институт вакиллари Ўзбекистонда давлат харидлари ва ҳукумат очиқ маълумотларини қамраб оладиган ҳамда мавжуд порталларни интеграциялаш ва модернизация қилишда институт олимлари билан яқиндан ҳамкорлик қилиш, мамлакатимиздаги тизимларни сунъий интеллект ёрдамида фойдаланувчиларга қулай ҳамда мукаммал қилиш бўйича келишувларга эришилди. Мазкур ҳамкорлик дастурларининг амалиётга татбиқ этилиши натижасида давлат харидлари ва бошқа очиқ маълумотлардан фуқаролар ва жамоатчилик вакилларининг фойдаланишини осонлаштириш, аҳолининг коррупцияга қарши курашишдаги фаоллигини ошириш, жамоатчилик назорати учун янги имкониятларни яратишга эришилиши таъкидланди.