Agentlik delegatsiyasining Yojef Shtefani nomidagi institut rahbariyati bilan uchrashuvida zamonaviy axborot kommunikatsiya texnologiyalari, ayniqsa, sun’iy intellektdan korrupsiyaga qarshi kurashish, jamoatchilik nazoratining ta’sirchan mexanizmlarini yo‘lga qo‘yishda amaliy hamkorlik qilish masalasi muhokama etildi. 

Ma’lumot uchun aytish kerakki, Yojef Shtefani nomidagi institut Yevropaning sun’iy intellekt sohasidagi yetakchi ilmiy-tadqiqot markazlaridan bo‘lib, bu yerda 1100 dan ortiq olimlar izlanish olib boradi. Institut Microsoft, Bloomberg singari dunyoning ilg‘or kompaniyalariga o‘z mahsulotlarini yetkazib beradi. Xususan, institut olimlari tomonidan yaratilgan sun’iy intellekt algoritmi yordamida bugungi Sloveniyada muvaffaqiyatli faoliyat yuritayotgan, korrupsiyaviy omillarni oldini olishga qaratilgan ERAR portalining asosi yaratilgan.

                                                        
Agentlik va institut vakillari O‘zbekistonda davlat xaridlari va hukumat ochiq ma’lumotlarini qamrab oladigan hamda mavjud portallarni integratsiyalash va modernizatsiya qilishda institut olimlari bilan yaqindan hamkorlik qilish, mamlakatimizdagi tizimlarni sun’iy intellekt yordamida foydalanuvchilarga qulay hamda mukammal qilish bo‘yicha kelishuvlarga erishildi. Mazkur hamkorlik dasturlarining amaliyotga tatbiq etilishi natijasida davlat xaridlari va boshqa ochiq ma’lumotlardan fuqarolar va jamoatchilik vakillarining foydalanishini osonlashtirish, aholining korrupsiyaga qarshi kurashishdagi faolligini oshirish, jamoatchilik nazorati uchun yangi imkoniyatlarni yaratishga erishilishi ta’kidlandi.