Учрашув аввалида Коррупцияга қарши курашиш агентлиги директори Акмал Бурханов Ўзбекистонда амалга оширилаётган ислоҳотлар, шу жумладан, суд-ҳуқуқ ва коррупцияга қарши курашиш, инвестиция муҳитини яхшилаш, туризм йўлидаги тўсиқларни бартараф этиш, валютани либераллаштириш соҳаларида принципиал ўзгаришлар юз берганини таъкидлади. 

Ўз ўрнида, Станислав Рашчан Ўзбекистонда сўнгги йилларда мисли кўрилмаган ислоҳотлар амалга оширилаётгани, бу эса Словения ва Ўзбекистон ўртасидаги сиёсий, савдо-иқтисодий ва дипломатик муносабатлар ривожланишига ижобий таъсир кўрсатаётганлигини таъкидлаб, ўзаро ҳамкорлик алоқаларини янада ривожлантириш мақсадида икки давлат ўртасида ҳукуматлараро комиссия фаолиятини йўлга қўйиш бўйича амалий чоралар кўриш учун етарли асослар яратилганини таъкидлади.  Бундай комиссиянинг ташкил этилиши ўзаро самарали ва доимий мулоқот каналларини йўлга қўйишга хизмат қилади, деди Ташқи ишлар вазирлиги вакили. 

Шунингдек, вазирлик давлат котиби Ўзбекистоннинг Словенияда дипломатик миссияси фаолиятини йўлга қўйишнинг мавриди келганини ва бу томонларни қизиқтирган масалалар бўйича оператив қарорлар қабул қилиш, икки мамлакат бизнес доиралари ҳамкорлигини кучайтириш ва бошқа масалаларда долзарб аҳамият касб этишини билдириди. 

Бундан ташқари, учрашув давомида Ўзбекистонда туризм иқтисодиётнинг ва мамлакат очиқлигининг локомотивига айланаётгани, бунинг учун визасиз режим жорий этилаётгани, туризм соҳасида сервисни ривожлантириш учун давлат томонидан жуда катта миқдорда инвестиция киритилаётгани, зиёрат туризми имкониятларидан самарали фойдаланилаётгани ҳақида ахборот берилди.