Uchrashuv avvalida Korrupsiyaga qarshi kurashish agentligi direktori Akmal Burxanov O‘zbekistonda amalga oshirilayotgan islohotlar, shu jumladan, sud-huquq va korrupsiyaga qarshi kurashish, investitsiya muhitini yaxshilash, turizm yo‘lidagi to‘siqlarni bartaraf etish, valyutani liberallashtirish sohalarida prinsipial o‘zgarishlar yuz berganini ta’kidladi. 

O‘z o‘rnida, Stanislav Rashchan O‘zbekistonda so‘nggi yillarda misli ko‘rilmagan islohotlar amalga oshirilayotgani, bu esa Sloveniya va O‘zbekiston o‘rtasidagi siyosiy, savdo-iqtisodiy va diplomatik munosabatlar rivojlanishiga ijobiy ta’sir ko‘rsatayotganligini ta’kidlab, o‘zaro hamkorlik aloqalarini yanada rivojlantirish maqsadida ikki davlat o‘rtasida hukumatlararo komissiya faoliyatini yo‘lga qo‘yish bo‘yicha amaliy choralar ko‘rish uchun yetarli asoslar yaratilganini ta’kidladi.  Bunday komissiyaning tashkil etilishi o‘zaro samarali va doimiy muloqot kanallarini yo‘lga qo‘yishga xizmat qiladi, dedi Tashqi ishlar vazirligi vakili. 

Shuningdek, vazirlik davlat kotibi O‘zbekistonning Sloveniyada diplomatik missiyasi faoliyatini yo‘lga qo‘yishning mavridi kelganini va bu tomonlarni qiziqtirgan masalalar bo‘yicha operativ qarorlar qabul qilish, ikki mamlakat biznes doiralari hamkorligini kuchaytirish va boshqa masalalarda dolzarb ahamiyat kasb etishini bildiridi. 

Bundan tashqari, uchrashuv davomida O‘zbekistonda turizm iqtisodiyotning va mamlakat ochiqligining lokomotiviga aylanayotgani, buning uchun vizasiz rejim joriy etilayotgani, turizm sohasida servisni rivojlantirish uchun davlat tomonidan juda katta miqdorda investitsiya kiritilayotgani, ziyorat turizmi imkoniyatlaridan samarali foydalanilayotgani haqida axborot berildi.