Жаҳон банки вице-президенти Анна Бьерденинг 2021 йил 14-19 май кунлари ташрифи чоғида эришилган келишувларни амалга ошириш мақсадида тасдиқланган «Йўл харитаси»га биноан Агентликка Жаҳон банки ҳамкорлигида Коррупцияга қарши курашишнинг институционал салоҳиятини кучайтириш вазифаси белгиланган.

Мазкур вазифа ижросини таъминлаш ва хорижий томон билан ҳамкорлик алоқаларини мустаҳкамлаш мақсадида жорий йилнинг 21 октябрь куни Агентлик ва Жаҳон банки вакиллари ўртасида учрашув ташкил этилди.

Маълумот учун: Жаҳон банки 1944 йилда ташкил этилган. Бош қароргоҳи Вашингтон (АҚШ) да жойлашган мазкур ташкилотнинг дунё бўйлаб 120 дан ортиқ идоралари мавжуд. Банк тизимида 10 мингдан ортиқ киши ишлайди.

Ўзбекистон Республикаси Жаҳон банкига 1992 йил сентябрь ойида қўшилган бўлиб, Тошкент шаҳрида ваколатхонасига эга.

Тадбирда Агентлик томонидан Жамоатчилик билан алоқалар, мурожаатлар билан ишлаш ва халқаро ҳамкорлик бошқармаси вакиллари, Жаҳон банки томонидан эса банкнинг молиявий менежмент бўйича катта мутахассислари Андрей Бусуйок ва Элбек Юсуповлар иштирок этишди.

Учрашув давомида, Агентлик томонидан ҳамкорликни амалга ошириш ва ривожлантириш бўйича бир қатор таклифлар илгари сурилди, жумладан, давлат органлари ва ташкилотлари фаолияти очиқлигини таъминлаш ҳамда коррупцияга қарши курашиш соҳасида давлат сиёсатини шакллантиришда илғор хорижий тажрибани ўрганиш ва экспертлик ёрдами кўрсатиш, Агентлик ходимлари салоҳияти ва малакасини оширишга қаратилган семинар-тренинг, стажировка ва бошқа шу каби тадбирларни ташкил этиш юзасидан фикр алмашилди.

Ўзаро мулоқот тарзида ташкил этилган мазкур учрашув якунида икки тараф вакиллари томонидан ҳамкорлик алоқаларини йўлга қўйиш ва коррупцияга қарши курашиш борасида қўшма лойиҳаларни ишга тушириш масаласини кўриб чиқиш юзасидан келишиб олинди.