Жорий йилнинг 29 октябрь куни Коррупцияга қарши курашиш агентлигининг навбатдаги йиғилиши бўлиб ўтди. Унда Агентлик ҳузуридаги Жамоатчилик кенгаши фаолиятини такомиллаштиришга қаратилган чора–тадбирлар ҳамда бошқа ташкилий масалалар кўриб чиқилди.

Дастлаб Жамоатчилик кенгашлари фаолияти самарадорлигини рейтинг баҳолаш тартиби муҳокама қилинди. Таъкидланганидек, мазкур баҳолаш тизими жамоатчилик кенгашлари томонидан амалга оширилаётган ишлар натижадорлигини аниқлаш ва уларнинг янада очиқ, шаффоф ва ошкора фаолият кўрсатишини таъминлаш мақсадида ишлаб чиқилган.

Баҳолаш жараёнида Кенгаш аъзоларининг оммавий ахборот воситалари билан ҳамкорлиги, ижтимоий шерикликка оид тадбирлар ҳамда жамоатчилик эшитувларининг ташкил этилгани, шунингдек, жамоатчилик мониторинги институтларидан қай даражада самарали  фойдаланилгани сингари  асосий йўналишларга эътибор қаратилади. Йиғилишда шу хусусда сўз борар экан, Кенгаш аъзолари томонидан айрим бандларда қайд этилган кўрсаткичларни ихтисослаштириш ҳамда уларни янада такомиллаштиришга қаратилган қўшимчалар киритиш таклиф этилди.

Мулоқот давомида ташкилий масала ҳам кўриб чиқилди. Унга кўра, айни пайтда вакант бўлган кенгаш раиси ўринбосари лавозимига номзодлар орасидан Кенгаш аъзоларининг кўпчилик овози билан Мукадамов Бобир Бахшиллоевич сайланди.

Маълумот учун: Б. Мукадамов “BOS SODALIS” адвокатлик фирмаси адвокати саналади. У фаолияти давомида  Адлия, Инновацион ривожланиш, Маданият вазирликлари тизимида иш олиб борган.

Бундан ташқари, 9 декабр – Халқаро коррупцияга қарши курашиш куни доирасида ташкил этиладиган Аксилкоррупция медиа-ҳафталиги доирасидаги тадбирларда фаол иштирок этиш ҳам йиғилишнинг асосий масалалари қаторидан жой олди.