Joriy yilning 29 oktabr kuni Korrupsiyaga qarshi kurashish agentligining navbatdagi yig‘ilishi bo‘lib o‘tdi. Unda Agentlik huzuridagi Jamoatchilik kengashi faoliyatini takomillashtirishga qaratilgan chora–tadbirlar hamda boshqa tashkiliy masalalar ko‘rib chiqildi.

Dastlab Jamoatchilik kengashlari faoliyati samaradorligini reyting baholash tartibi muhokama qilindi. Ta’kidlanganidek, mazkur baholash tizimi jamoatchilik kengashlari tomonidan amalga oshirilayotgan ishlar natijadorligini aniqlash va ularning yanada ochiq, shaffof va oshkora faoliyat ko‘rsatishini ta’minlash maqsadida ishlab chiqilgan.

Baholash jarayonida Kengash a’zolarining ommaviy axborot vositalari bilan hamkorligi, ijtimoiy sheriklikka oid tadbirlar hamda jamoatchilik eshituvlarining tashkil etilgani, shuningdek, jamoatchilik monitoringi institutlaridan qay darajada samarali  foydalanilgani singari  asosiy yo‘nalishlarga e’tibor qaratiladi. Yig‘ilishda shu xususda so‘z borar ekan, Kengash a’zolari tomonidan ayrim bandlarda qayd etilgan ko‘rsatkichlarni ixtisoslashtirish hamda ularni yanada takomillashtirishga qaratilgan qo‘shimchalar kiritish taklif etildi.

Muloqot davomida tashkiliy masala ham ko‘rib chiqildi. Unga ko‘ra, ayni paytda vakant bo‘lgan kengash raisi o‘rinbosari lavozimiga nomzodlar orasidan Kengash a’zolarining ko‘pchilik ovozi bilan Mukadamov Bobir Baxshilloyevich saylandi.

Ma’lumot uchun: B. Mukadamov “BOS SODALIS” advokatlik firmasi advokati sanaladi. U faoliyati davomida  Adliya, Innovatsion rivojlanish, Madaniyat vazirliklari tizimida ish olib borgan.

Bundan tashqari, 9 dekabr – Xalqaro korrupsiyaga qarshi kurashish kuni doirasida tashkil etiladigan Aksilkorrupsiya media-haftaligi doirasidagi tadbirlarda faol ishtirok etish ham yig‘ilishning asosiy masalalari qatoridan joy oldi.