4 ноябрь куни Коррупцияга қарши курашиш Агентлиги вакили БМТ Тараққиёт Дастури Глобал билим алмашинуви Сеул сиёсат маркази ва БМТ ТДнинг “Тинч ва инклюзив жамиятлар учун глобал коррупцияга қарши кураш дастури” томонидан ташкил этилган "Коррупцияни олдини олишнинг самарали механизмлари: Корея ва БМТ ТД ҳамкорлари тажрибасидан олинган сабоқлар" халқаро вебинарида маъруза билан иштирок этди.

Вебинарнинг мақсади - коррупцияга қарши курашишнинг самарали воситаларини жорий этиш ва коррупциянинг олдини олиш бўйича глобал тажрибага асосланган БМТ ТДнинг USPC ва ACPIS лойиҳалари ҳамкор давлатлари ўртасида тажриба ва билим алмашишдан иборат бўлди.

Мазкур тадбирда хусусан, Кореянинг "Коррупцияга қарши ташаббусни баҳолаш" механизмини амалга ошириш тажрибаси муҳокама қилинди. Агентлик вакили Корея тажрибаси асосида Ўзбекистондаги БМТ ТД дастури билан ҳамкорликда ишлаб чиқилаётган "Ўзбекистон Республикаси давлат органлари ва ташкилотларида коррупцияга қарши курашиш чора-тадбирлари самарадорлигини баҳолаш тизими" лойиҳаси бўйича тақдимот қилди.

Шунингдек, БМТ ТД глобал дастурининг коррупцияга қарши курашиш бўйича экспертлари коррупциянинг олдини олишнинг самарали механизмлари ҳақида ўз тажрибалари ва билимлари билан ўртоқлашдилар.