Жорий йилнинг 11 ноябрь куни Коррупцияга қарши курашиш агентлиги ва «Минтақавий мулоқот» халқаро нодавлат ташкилоти вакиллари ўртасида учрашув ташкил этилди.

Учрашувга Минтақавий Мулоқот ташкилоти ҳуқуқ соҳаси мутахассиси Горан Клеменчич ташриф буюрди. 

Мулоқот давомида Словения Республикасига амалга оширилган ташриф мобайнида илгари сурилган таклифлар, хусусан, Словения Республикасининг Жозеф Стефани номидаги институт кўмагида Ўзбекистонда давлат харидлари ва ҳукумат очиқ маълумотларини қамраб оладиган мавжуд порталларни интеграциялаш ва модернизация қилишда институт профессори Матео Ковачич билан ишлаш ҳақида сўз борди.

Шунингдек, декларациялаш тизимини жорий этиш бўйича ишлаб чиқилаётган дастурда хавфларни аниқлаш алгоритмларини жорий қилишда Словения, АҚШ, Украина ва бошқа бир қатор давлатлар тажрибаларини ўрганиш ҳамда Агентликнинг АКТ мутахассислари билан ўзаро алоқаларни йўлга қўйиш каби таклиф ва масалалар муҳокамалар марказида бўлди.. 

Бундан ташқари, Аксилкоррупция ҳафталиги доирасида Словения эксперти, Агентлик ва «Юксалиш» умуммиллий ҳаракати ҳамкорлигида мактабларда олиб борилаётган коррупция хавфларини баҳолаш бўйича лойиҳасини  тақдим этишга келишилди. 

Тадбир якунида томонлар келгусидаги ҳамкорлик алоқаларини янада мустаҳкамлаш, шу жумладан, 2021 йил ноябрь ойи охирида Zoom платформаси орқали онлайн учрашув ташкиллаштириш юзасидан келишувга эришдилар.