Жорий йилнинг 11 ноябрь куни Агентлик, Бирлашган Миллатлар Ташкилоти Тараққиёт дастури (БМТ ТД) вакиллари ҳамда БМТ ТДнинг аксилкоррупция йўналишидаги эксперти Хачик Харутюнян билан учрашув ташкил этилди.

Дастлаб, Агентлик директори ўринбосари У.Тухташева Ўзбекистонга ташриф буюрган экспертга юртимизда коррупцияга қарши курашиш сиёсатининг шаклланиши, бунда Агентликнинг ўрни ва вазифаси, соҳага оид олиб борилаётган ислоҳотлар, изчил ўзгаришлар ва амалга оширилаётган чора-тадбирлар тўғрисида батафсил маълумот берди.

Учрашув давомида Агентлик томонидан коррупциянинг олдини олиш ва унга қарши курашиш соҳасида мамлакатнинг имижини мустаҳкамлаш ва унинг халқаро рейтинглардаги ўрнини ошириш бўйича тизимли чора-тадбирларни амалга ошириш, Коррупцияга қарши курашиш бўйича Стратегияни ишлаб чиқиш сингари масалалар муҳокама қилинди.

Шу билан бир қаторда, 2021 йилдан бошлаб Ўзбекистон ҳудудида «Коррупциясиз ҳудуд» лойиҳасини амалга ошириш кўзда тутилган бўлиб, мазкур масалада БМТ ТД эксперти билан ҳамкорлик қилиш, тажриба алмашиш юзасидан дастлабки келишувга эришилди.

Мулоқот якунида томонлар келгусидаги ҳамкорлик йўналишларини кенгайтириш ва алоқаларни янада мустаҳкамлаш, қолаверса, тадбир давомида илгари сурилган таклиф ва масалаларни ишчи тартибда кўриб чиқишда муҳокамаларни давом эттиришга келишиб олдилар.