Жорий йилнинг 15-16 ноябрь кунлари Коррупцияга қарши курашиш агентлиги ҳамда Олий Мажлис Сенатининг Ахборот сиёсати ва давлат органларида очиқликни таъминлаш масалалари қўмитаси ҳамкорлигида Қашқадарё ва Сурхондарё вилоятларида маҳаллий давлат ҳокимияти органлари томонидан фаолият очиқлигини таъминлаш бўйича амалга оширилаётган ишлар муҳокамасига  бағишланган йиғилиш ўтказилди.  

Муҳокамада сенаторлар, халқ депутатлари вилоят, туман ва шаҳар Кенгашлари депутатлари, маҳаллий ҳокимлик мутасаддилари, масъул вазирлик ва идораларнинг ҳудудий раҳбарлари ҳамда ОАВ вакиллари иштирок этди.

Йиғилишда жорий йилнинг 1-4 ноябрь кунлари ишчи гуруҳи  томонидан ўтказилган ўрганиш натижасига кўра, вилоятдаги айрим давлат органлари ва ташкилотларининг очиқ маълумотларни кенг жамоатчилик ихтиёрига тақдим қилишни таъминлашда йўл қўйган хато ва камчиликлари юзасидан маълумот берилди.

Таъкидланганидек, Коррупцияга қарши курашиш агентлиги давлат органлари ва ташкилотлари, шу жумладан, маҳаллий давлат ҳокимияти органлари томонидан Ўзбекистон Республикаси Президентининг ПФ-6247-сон Фармони билан белгиланган ижтимоий аҳамиятга молик маълумотларни расмий веб-сайт ва Очиқ маълумотлар порталида ўз вақтида ҳамда тўлиқ эълон қилиниши, кўрсатилган муддатларда янгилаб борилиши ҳолатини   мунтазам мониторинг қилиб бормоқда.

Мониторинг ва жойларда ўтказилган ўрганиш натижалари шуни кўрсатмоқдаки, соҳада амалга оширилган ишлар билан бирга тизимли муаммолар мавжуд бўлиб, уларни бартараф этишга қаратилган самарали чора-тадбирлар ишлаб чиқилмаган.

Хусусан, маҳаллий давлат ҳокимияти органлари ва ҳудудий бошқармаларда ахборотлар очиқлигини таъминлаш бўйича расмий веб-сайтлардаги бир қатор саҳифаларнинг қонунчиликда белгиланган муддатларда янгилаб борилиши таъминланмаган.

Масалан, Сурхондарё вилояти ҳокимлигининг (www.surxondaryo.uz) расмий веб-сайтида давлат харидлари ва харид комиссияси таркиби, давлат органлари ва ташкилотлари тасарруфидаги автомототранспорт воситалари, хизмат уйлари ва бошқа кўчмас мулклар ҳақидаги ижтимоий аҳамиятга молик маълумотларни ўз вақтида жойлаштириб бориш ва даврий янгилаб боришда камчиликларга йўл қўйилган.

Бундай сусткашлик Қашқадарё вилоятининг Қамаши, Қарши, Ғузор, Чироқчи туманлари ва Қарши шаҳар ҳокимлиги расмий веб-сайтларида ҳам аниқланган бўлиб, ижтимоий аҳамиятга молик маълумотлар доимий равишда янгилаб борилмаган.

Вилоятда давлат органлари ва ташкилотлари фаолиятида очиқликни таъминлаш, мувофиқлаштириб бориш ва тизимли мониторингни ташкил этиш борасида шу каби камчиликлар билан бир қаторда ижобий ишлар ҳам амалга оширилган.

Масалан, Халқ депутатлари Қашқадарё вилоят кенгашининг ахборот сиёсати ва маҳаллий давлат органларида очиклиқни таъминлаш масалалари бўйича доимий комиссиянинг (www.qashaxborotsiyosati.uz) веб-сайти ташкил этилган бўлиб, унда соҳада амалга оширилган ишлар тизимли ёритиб борилмоқда.  

Комиссия ташаббуси асосида ҳудудий давлат органлари ва ташкилотлари ҳамда бошқа фойдаланувчилар учун Очиқ маълумотлар портали билан ишлаш тартибига оид видеоролик ишлаб чиқилган ва мазкур веб-сайтга жойлаштирилган.  

Бундан ташқари, ҳудудий давлат органлари ва ташкилотлари томонидан соҳада йўл қўйилаётган хато ва камчиликларни комиссия йиғилишида мунтазам муҳокама қилиб бориш ҳамда ишлаб чиқилган чора-тарбирларни  мувофиқлаштириб бориш тартиби жорий этилган.

Танқидий руҳда ўтган йиғилишда аниқланган камчиликларни бартараф этиш бўйича мутасаддиларга тегишли кўрсатмалар берилди. Шунингдек, Халқ депутатлари вилоят, шаҳар ва туман Кенгашларида тузилган Ахборот сиёсати ва маҳаллий давлат органларида очиқликни таъминлаш масалалари бўйича доимий комиссия аъзолари учун норматив-ҳуқуқий ҳужжатларда давлат органлари ва ташкилотлари фаолиятининг очиқлигини таъминлаш бўйича белгиланган талаблар ижросини доимий назоратга олишга қаратилган  тегишли тавсиялар ишлаб чиқилди.