Joriy yilning 15-16 noyabr kunlari Korrupsiyaga qarshi kurashish agentligi hamda Oliy Majlis Senatining Axborot siyosati va davlat organlarida ochiqlikni ta’minlash masalalari qo‘mitasi hamkorligida Qashqadaryo va Surxondaryo viloyatlarida mahalliy davlat hokimiyati organlari tomonidan faoliyat ochiqligini ta’minlash bo‘yicha amalga oshirilayotgan ishlar muhokamasiga  bag‘ishlangan yig‘ilish o‘tkazildi.  

Muhokamada senatorlar, xalq deputatlari viloyat, tuman va shahar Kengashlari deputatlari, mahalliy hokimlik mutasaddilari, mas’ul vazirlik va idoralarning hududiy rahbarlari hamda OAV vakillari ishtirok etdi.

Yig‘ilishda joriy yilning 1-4 noyabr kunlari ishchi guruhi  tomonidan o‘tkazilgan o‘rganish natijasiga ko‘ra, viloyatdagi ayrim davlat organlari va tashkilotlarining ochiq ma’lumotlarni keng jamoatchilik ixtiyoriga taqdim qilishni ta’minlashda yo‘l qo‘ygan xato va kamchiliklari yuzasidan ma’lumot berildi.

Ta’kidlanganidek, Korrupsiyaga qarshi kurashish agentligi davlat organlari va tashkilotlari, shu jumladan, mahalliy davlat hokimiyati organlari tomonidan O‘zbekiston Respublikasi Prezidentining PF-6247-son Farmoni bilan belgilangan ijtimoiy ahamiyatga molik ma’lumotlarni rasmiy veb-sayt va Ochiq ma’lumotlar portalida o‘z vaqtida hamda to‘liq e’lon qilinishi, ko‘rsatilgan muddatlarda yangilab borilishi holatini   muntazam monitoring qilib bormoqda.

Monitoring va joylarda o‘tkazilgan o‘rganish natijalari shuni ko‘rsatmoqdaki, sohada amalga oshirilgan ishlar bilan birga tizimli muammolar mavjud bo‘lib, ularni bartaraf etishga qaratilgan samarali chora-tadbirlar ishlab chiqilmagan.

Xususan, mahalliy davlat hokimiyati organlari va hududiy boshqarmalarda axborotlar ochiqligini ta’minlash bo‘yicha rasmiy veb-saytlardagi bir qator sahifalarning qonunchilikda belgilangan muddatlarda yangilab borilishi ta’minlanmagan.

Masalan, Surxondaryo viloyati hokimligining (www.surxondaryo.uz) rasmiy veb-saytida davlat xaridlari va xarid komissiyasi tarkibi, davlat organlari va tashkilotlari tasarrufidagi avtomototransport vositalari, xizmat uylari va boshqa ko‘chmas mulklar haqidagi ijtimoiy ahamiyatga molik ma’lumotlarni o‘z vaqtida joylashtirib borish va davriy yangilab borishda kamchiliklarga yo‘l qo‘yilgan.

Bunday sustkashlik Qashqadaryo viloyatining Qamashi, Qarshi, G‘uzor, Chiroqchi tumanlari va Qarshi shahar hokimligi rasmiy veb-saytlarida ham aniqlangan bo‘lib, ijtimoiy ahamiyatga molik ma’lumotlar doimiy ravishda yangilab borilmagan.

Viloyatda davlat organlari va tashkilotlari faoliyatida ochiqlikni ta’minlash, muvofiqlashtirib borish va tizimli monitoringni tashkil etish borasida shu kabi kamchiliklar bilan bir qatorda ijobiy ishlar ham amalga oshirilgan.

Masalan, Xalq deputatlari Qashqadaryo viloyat kengashining axborot siyosati va mahalliy davlat organlarida ochikliqni ta’minlash masalalari bo‘yicha doimiy komissiyaning (www.qashaxborotsiyosati.uz) veb-sayti tashkil etilgan bo‘lib, unda sohada amalga oshirilgan ishlar tizimli yoritib borilmoqda.  

Komissiya tashabbusi asosida hududiy davlat organlari va tashkilotlari hamda boshqa foydalanuvchilar uchun Ochiq ma’lumotlar portali bilan ishlash tartibiga oid videorolik ishlab chiqilgan va mazkur veb-saytga joylashtirilgan.  

Bundan tashqari, hududiy davlat organlari va tashkilotlari tomonidan sohada yo‘l qo‘yilayotgan xato va kamchiliklarni komissiya yig‘ilishida muntazam muhokama qilib borish hamda ishlab chiqilgan chora-tarbirlarni  muvofiqlashtirib borish tartibi joriy etilgan.

Tanqidiy ruhda o‘tgan yig‘ilishda aniqlangan kamchiliklarni bartaraf etish bo‘yicha mutasaddilarga tegishli ko‘rsatmalar berildi. Shuningdek, Xalq deputatlari viloyat, shahar va tuman Kengashlarida tuzilgan Axborot siyosati va mahalliy davlat organlarida ochiqlikni ta’minlash masalalari bo‘yicha doimiy komissiya a’zolari uchun normativ-huquqiy hujjatlarda davlat organlari va tashkilotlari faoliyatining ochiqligini ta’minlash bo‘yicha belgilangan talablar ijrosini doimiy nazoratga olishga qaratilgan  tegishli tavsiyalar ishlab chiqildi.