Аввал хабар берганимиздек, жорий йилнинг 28 октябрь куни Коррупцияга қарши курашиш агентлиги, Буюк Британиянинг Ўзбекистондаги дипломатик ваколатхонаси ва Ҳукуматлараро Ҳамкорлик Хизмати ўртасида уч томонлама Англашув Меморандуми имзоланган эди.  

Мазкур Меморандумини амалга ошириш мақсадида Агентлик ва Ҳукуматлараро Ҳамкорлик Хизматининг 2021-2022 йилларга мўлжалланган тадбирлар дастури ишлаб чиқилган. Дастур доирасида Агентлик ходимлари салоҳияти ва тажрибасини оширишга қаратилган семинар, тренинг ва шу каби бошқа тадбирлар ўтказилиши кўзда тутилган. 

Шу муносабат билан жорий йилнинг 17-18 ноябрь кунлари Ҳукуматлараро Ҳамкорлик Хизмати вакиллари томонидан Агентлик ходимлари учун давлат органлари ва ташкилотларида ҳуқуқбузарлик тўғрисида хабар бериш бўйича Буюк Британия тажрибасига бағишланган семинарлар ташкил этилди. Унда Ҳукуматлараро Ҳамкорлик Хизмати вакиллари - Майкл Галлаҳер, Квентин Оливер ва Товстен Соренсен иштирок этди. 

Семинарлар давомида Ҳукуматлараро Ҳамкорлик Хизмати фаолиятининг асосий йўналишлари, Буюк Британия Бош вазирининг имплементация гуруҳлари, уларнинг давлат органлари ва ташкилотлари устувор вазифалар бажарилишини таҳлил ва мониторинг қилишдаги роли хусусида маълумот берилди. 

Иштирокчилар, шунингдек, коррупциявий ҳуқуқбузарликлар тўғрисида хабар берувчи шахслар билан ишлаш, уларнинг ҳуқуқларини ҳимоя қилиш бўйича Буюк Британия тажрибаси билан яқиндан танишди. 

Тадбирлар якунида ўзаро мулоқотларда кўриб чиқилган масалалар бўйича ҳамкорликни давом эттиришга келишиб олинди.