Avval xabar berganimizdek, joriy yilning 28 oktabr kuni Korrupsiyaga qarshi kurashish agentligi, Buyuk Britaniyaning O‘zbekistondagi diplomatik vakolatxonasi va Hukumatlararo Hamkorlik Xizmati o‘rtasida uch tomonlama Anglashuv Memorandumi imzolangan edi.  

Mazkur Memorandumini amalga oshirish maqsadida Agentlik va Hukumatlararo Hamkorlik Xizmatining 2021-2022 yillarga mo‘ljallangan tadbirlar dasturi ishlab chiqilgan. Dastur doirasida Agentlik xodimlari salohiyati va tajribasini oshirishga qaratilgan seminar, trening va shu kabi boshqa tadbirlar o‘tkazilishi ko‘zda tutilgan. 

Shu munosabat bilan joriy yilning 17-18 noyabr kunlari Hukumatlararo Hamkorlik Xizmati vakillari tomonidan Agentlik xodimlari uchun davlat organlari va tashkilotlarida faoliyatdagi ustuvor vazifalar bajarilishini monitoring va tahlil qilish, shuningdek, huquqbuzarlik to‘g‘risida xabar berish bo‘yicha Buyuk Britaniya tajribasiga bag‘ishlangan seminarlar tashkil etildi. Unda Hukumatlararo Hamkorlik Xizmati vakillari - Maykl Gallaher, Kventin Oliver va Tovsten Sorensen ishtirok etdi. 

Seminarlar davomida Hukumatlararo Hamkorlik Xizmati faoliyatining asosiy yo‘nalishlari, Buyuk Britaniya Bosh vazirining implementatsiya guruhlari faoliyati, ularning davlat organlari va tashkilotlari faoliyatidagi ustuvor vazifalar bajarilishini tahlil va monitoring qilishdagi roli xususida ma’lumot berildi. 

Ishtirokchilar, shuningdek, korrupsiyaviy huquqbuzarliklar to‘g‘risida xabar beruvchi shaxslar bilan ishlash, ularning huquqlarini himoya qilish bo‘yicha Buyuk Britaniya tajribasi bilan yaqindan tanishdi. 

Tadbirlar yakunida o‘zaro muloqotlarda ko‘rib chiqilgan masalalar bo‘yicha hamkorlikni davom ettirishga kelishib olindi.