“Аксилкоррупция ҳафталиги” доирасида жорий йилнинг 22 ноябрь куни “Банк-молия соҳасидаги коррупцияга қарши курашишнинг долзарб масалалари” мавзусида давра суҳбати бўлиб ўтди.

Тадбир Тараққиёт стратегияси” маркази ташаббуси билан Олий Мажлис Қонунчилик палатасининг Коррупцияга қарши курашиш ва суд-ҳуқуқ масалалари қўмитаси, Коррупцияга қарши курашиш агентлиги, Ўзбекистон Республикаси Молия вазирлиги ҳамда Марказий банк ҳамкорлигида ташкил этилди.

Унда “Тараққиёт стратегияси” маркази экспертлари, Қонунчилик палатаси депутатлари,  Коррупцияга қарши курашиш агентлиги ходимлари, Молия вазирлиги, Адлия вазирлиги, Давлат солиқ қўмитаси ва Марказий банк мутахассислари томонидан Ўзбекистонда коррупцияга қарши курашиш борасида амалга оширилаётган ишлар таҳлил қилиниб, галдаги вазифалар муҳокама қилинди.

Хусусан, банк тизимида коррупцияга қарши “комплаенс назорат”нинг жорий этилиши, норматив-ҳуқуқий ҳужжатлар ва лойиҳаларини коррупцияга қарши экспертиза қилиш хусусида ўзаро фикр алмашилди.

Таъкидланишича, банк-молия тизимида коррупциянинг олдини олиш, унга қарши курашиш бўйича халқаро андозалар ва нормаларни миллий қонунчиликка имплементация қилиш соҳадаги амалий ташаббусларни ўз вақтида ҳаётга татбиқ этилишида, замонавий услуб ва ёндашувларни қўллашда муҳим аҳамият касб этади.

Тадбир давомида иштирокилар томонидан молия тизими, бюджет соҳасида коррупцияга қарши курашиш бўйича амалга оширилаётган ишларга алоҳида эътибор қаратилиб, коррупция билан боғлиқ ҳолатлар энг кўп учраётган йўналишлар таҳлил қилинди. Қайд этилишича, бу борада аксарият ҳуқуқбузарликлар давлат бюджети маблағларидан фойдаланиш, давлат харидлари, лицензия ва рухсатномаларни олиш, банк кредитларини ажратиш каби йўналишларда кўзга ташланмоқда.

Давра суҳбатида эксперт ва мутахассислар томонидан ана шундай салбий ҳолатларни келтириб чиқарувчи омилларни бартараф этиш бўйича тегишли таклиф ва тавсиялар илгари сурилди.