Бугун, 26 ноябрь куни Фавқулодда вазиятлар вазирлигида “9 декабрь – Халқаро коррупцияга қарши кураш” кунига бағишланган “Аксилкоррупция ҳафталиги” доирасида “Коррупция – ривожланишимизга тўсиқ!” мавзусида давра суҳбати бўлиб ўтди. Унда Ўзбекистон Республикаси Коррупцияга қарши курашиш агентлиги, Ҳарбий суд ҳамда Ҳарбий прокуратуранинг масъул ходимлари иштирок этди.
 
Тадбирда коррупция давлат ва жамият фаровонлиги учун энг жиддий хавф-хатарлардан бири экани қайд этилиб, ушбу ижтимоий иллат келтириб чиқарадиган оқибатлар аниқ мисоллар орқали таҳлил қилинди. 

Эътироф этилганидек, мамлакатимизда коррупцияга қарши муросасиз курашишнинг илғор халқаро стандартларга асосланган тизимини жорий этиш мақсадида миллий қонунчилик ҳужжатлари тобора такомиллаштирилиб бормоқда ва бу коррупция ҳолатларининг ҳар қандай кўринишларига нисбатан муросасиз муносабатда бўлишга хизмат қилмоқда. 

Хусусан, давлат органлари ва ташкилотларининг фаолиятида очиқлик, ошкоралик, шаффофликни таъминлаш орқали давлат бошқарувида самарали ва таъсирчан жамоатчилик назоратини амалга ошириш учун зарур шароитлар яратилаётгани аҳамиятлидир.

Мулоқотда шу хусусда сўз юритилар экан, бюджет маблағларидан фойдаланиш, давлат харидлари, капитал қурилиш, лицензия ва рухсатномаларни олиш, банк кредитларини ажратиш, ишга қабул қилиш каби қатор йўналишларда коррупция ҳолатларининг олдини олиш ва ҳуқубузарликни ўз вақтида аниқлаш борасида олиб борилаётган чора-тадбирлар, уларнинг ижобий натижаларига ҳам эътибор қаратилди. 

Шунингдек, коррупцияга қарши курашиш тизимини янада такомиллаштиришда долзарблик касб этаётган вазифа ва мақсадлар, истиқболдаги режалар юзасидан ўзаро фикр алмашилди.