БМТнинг “Фарғона водийси ёшларининг ижтимоий уйғунлиги” қўшма дастури доирасида “Коррупцияга қарши курашиш ва ёшлар ўртасида ҳуқуқбузарликларнинг олдини олиш” мавзусида ташкил этилган туркум тренинглар бу гал фарғоналик ёш давлат хизматчиларини ўзаро мулоқотга чорлади.  

Бош прокуратура Академияси ва Коррупцияга қарши курашиш агентлиги ҳамкорлигида жорий йилнинг 19-20 ноябрь кунлари ўтказилган мазкур тадбирларда давлат хизматида коррупцияга қарши курашиш тизимини янада такомиллаштириш ва соҳага илғор халқаро стандартларни жорий этиш мақсадида мамлакатимиз Президенти ташаббуси билан қонунчиликка киритилаётган қатор янги механизм ва нормалар, амалга оширилаётган ислоҳотларга оид маърузалар тингланди. “Ёшлар ўртасида ҳуқуқбузарликлар профилактикаси” мавзусидаги интерфаол машғулотлар айни масаланинг мантиқий давоми бўлди.

Иштирокчилар, шунингдек, давлат хизматчилари томонидан мансаб ваколатларини суиистеъмол қилиш, манфаатлар тўқнашуви, порахўрлик ва бошқа коррупциоген ҳуқуқбузарликлар, уларга нисбатан қўлланиладиган чоралар борасида билим ва амалий кўникмаларини янада бойитди.  

Мулоқотлар давомида давлат хизматчиларининг ўз фаолиятини олиб бориш жараёнида амал қилиши лозим бўлган вазифалар, коррупцияни вужудга келишига имкон яратувчи сабаб ва  шарт-шароитларга йўл қўймасликнинг амалий ва ташкилий чора-тадбирлари юзасидан мулоҳазалар билдириб, таклифлар илгари сурилди.

Ёш давлат хизматчиларининг фикрича, коррупцион ҳолатларининг олдини олишда бошқарув фаолиятининг ошкоралиги ва шаффофлигини таъминлаш катта аҳамията эга. Шу боис давлат органлари фаолиятига замонавий ахборот технологияларини кенг татбиқ этиш, рақамлаштиришнинг илғор ютуқларини фаол қўллаш орқали бошқарув жараёнларида инсон омилини камайтиришга эришиш лозим. 

Тренингда мутахассислар томонидан ёшларни коррупцияга қарши курашишга ижтимоий сафарбар қилиш, давлат ва жамият ҳаётига даҳлдорлигини янада ошириш,  жамоатчилик назоратини кучайтиришда фаол иштирокини таъминлашга қаратилган тавсиялар  берилди.