Жорий йилнинг 2 декабрь куни Коррупцияга қарши курашиш агентлиги директори А.Бурханов Озарбайжон Республикаси Бош прокурори ўринбосари – Бош прокуратура ҳузуридаги Коррупцияга қарши курашиш бош бошқармаси бошлиғи Н.Раджабов бошчилигидаги делегацияни қабул қилди.

Тадбирда Озарбайжон Коррупцияга қарши курашиш бош бошқармаси бошлиғи Назим Раджабов, Бош прокуратура ҳузуридаги Коррупцияга қарши курашиш бош бошқармаси Ташкилий ва маълумот таъминоти бўлими вакиллари Натиг Эйвазов ва Камил Камилли иштирок этдилар.

Мулоқот аввалида Агентлик директори Ўзбекистон Республикасининг коррупцияга қарши курашиш сиёсати, бу борада олиб борилаётган сўнгги ислоҳотлар, қабул қилинган норматив-ҳуқуқий ҳужжатлар, коррупцияга қарши курашишда халқаро ҳамкорликнинг тутган ўрни тўғрисида батафсил тўхталиб ўтди.

Учрашув давомида Агентлик ва Озарбайжон Республикаси Коррупцияга қарши курашиш бош бошқармаси ўртасида ўзаро Англашув Меморандуми имзоланди.

Мазкур ҳужжат икки томонлама алоқаларни янада мустаҳкамлаш, тажриба алмашиш, Агентлик ходимларининг салоҳияти ва малакасини оширишга қаратилган семинар-тренинглар, ўқув дастурлар, стажировка  ва шу каби қўшма тадбирларни амалга оширишни қамраб олади.

Ўзаро мулоқот ва музокара тарзида ташкил этилган мазкур учрашув якунида икки тараф вакиллари томонидан ҳамкорлик алоқаларини янада ривожлантириш юзасидан келишиб олинди.