"9 декабрь – Халқаро коррупцияга қарши курашиш куни" муносабати билан “Аксилкоррупция ҳафталиги” доирасида ўтказилаётган тадбирлар давом этмоқда. Бу йилги ҳафталик қамрови ва жамиятнинг барча қатламини ўзида жамлай олгани билан аҳамиятлидир. Давлат идоралари, ҳуқуқни муҳофаза қилувчи органлар, бизнес ҳамжамияти, ёшлар шулар жумласидандир.

Навбатдаги тадбир жорий йилнинг 6 декабрь куни нодавлат нотижорат ташкилотлари учун “Коррупцияга қарши курашишда жамоатчилик билан ишлашнинг роли”  мавзусида тренинг шаклида ташкил этилди.

Тадбирдан кўзланган мақсад Коррупцияга қарши курашиш агентлиги, БМТ Тараққиёт дастури ҳамкорлигида коррупцияга қарши курашиш жараёнларига барча қатлам вакилларини жалб этиш, ННТ вакилларини коррупцияга қарши курашиш жараёнларидаги ислоҳотлардан хабардор қилиш ва ушбу йўналишдаги билимларни мустаҳкамлаш, шунингдек, Агентлик билан ҳамкорлик алоқаларини муҳокама қилиш иборат. 

Тренингда БМТ ТД, БМТ ГЖБ ташкилотлари ҳамда Грузия, Латвия мамлакатларидан халқаро экспертлар маъруза билан иштирок этди.

Тренинг давомида ННТ учун коррупцияга қарши курашишда янги усул ва воситалар, ушбу жараёнларда хорижий давлатлар тажрибасини ўрганиш, ОАВ орқали коррупциянинг олдини олиш ва ҳалолликни шакллантириш механизмлари каби мавзулар юзасидан маърузалар тингланди.

Шунингдек, тадбирда Агентлик ва “Юксалиш” умуммилий ҳаракати томонидан ишлаб чиқилган ва амалга оширилган “Антикоррупция лабораториялари” лойиҳаси доирасида бажарилган ишлар тақдимоти бўлиб ўтди. Мазкур лойиҳанинг дастлабки босқичи “Бошланғич мактабга қабул қилишда коррупция хавфи ва ҳалолликни баҳолаш” мавзусида ташкил этилди.

Тадқиқот сўровнома ва интервью шаклида олиб борилди ва у болаларни бошланғич мактабга қабул қилишда коррупция хавфи ва ҳалолликни баҳолашга қаратилди.

Тренинг давомида иштирокчилар амалий машғулотларда ҳам иштирок этишди. Якунда иштирокчилар ўзларини қизиқтирган саволларга жавоб олишди ва коррупцияга қарши курашиш жараёнида фуқаролик жамияти вакилларининг иштирокини янада кенгайтириш юзасидан таклиф ва тавсиялар беришди.