Жорий йилнинг 11 апрель куни Коррупцияга қарши курашиш агентлиги ва Латвия Республикасининг Ўзбекистондаги элчиси Рейнис Трокша ҳамда Рига Олий юридик мактаби  раҳбарияти ўртасида учрашув бўлиб ўтди. 

Маълумот учун: Рига Олий юридик мактаби (РГСЛ) – Рига шаҳрида жойлашган ихтисослашган юридик мактаб бўлиб, ҳуқуқни ўрганишни бизнес, халқаро муносабатлар, молия ва дипломатия курслари билан бирлаштириш орқали фанлараро бакалавриат ва магистрлик дастурларини таклиф этади.

Учрашувда ўзаро ҳамкорлик алоқаларини ривожлантириш, хусусан, қўшма тадбирлар, семинар-тренингларни ташкил этиш, Агентлик ходимларининг Рига Олий юридик мактабида стажировкаларини амалга ошириш ҳамда мазкур мактаб томонидан ташкил этилаётган 12 ҳафталик Европа ҳуқуқи ва иқтисодиёти бўйича илғор дастурда иштирок этиш масалалари муҳокама қилинди. 

Ўз ўрнида, элчи жаноблари томонидан Латвиянинг коррупцияга қарши курашишга масъул ва унда фаолиятини олиб борувчи ваколатли идора ва ташкилотларида стажировкаларни амалга ошириш таклифи билдирилди. Шунингдек, Рига Олий юридик мактаби директори Агентлик сўровига биноан мазкур соҳада ўқув дастурлар ишлаб чиқишни маълум қилди.

Тадбир якунида томонлар Агентлик делегациясининг май ойида Латвияга режалаштирилаётган ташрифини амалга оширишда кўмаклашиш ва ҳамкорлик қилиш юзасидан келишувга эришди.

Коррупцияга қарши курашиш агентлиги

Ахборот хизмати