Joriy yilning 11-aprel kuni Korrupsiyaga qarshi kurashish agentligi va Latviya Respublikasining Oʻzbekistondagi elchisi Reynis Troksha hamda Riga Oliy yuridik maktabi  rahbariyati oʻrtasida uchrashuv boʻlib oʻtdi. 

Maʼlumot uchun: Riga Oliy yuridik maktabi (RGSL) – Riga shahrida joylashgan ixtisoslashgan yuridik maktab boʻlib, huquqni oʻrganishni biznes, xalqaro munosabatlar, moliya va diplomatiya kurslari bilan birlashtirish orqali fanlararo bakalavriat va magistrlik dasturlarini taklif etadi.

Uchrashuvda oʻzaro hamkorlik aloqalarini rivojlantirish, xususan, qoʻshma tadbirlar, seminar-treninglarni tashkil etish, Agentlik xodimlarining Riga Oliy yuridik maktabida stajirovkalarini amalga oshirish hamda mazkur maktab tomonidan tashkil etilayotgan 12 haftalik Yevropa huquqi va iqtisodiyoti boʻyicha ilgʻor dasturda ishtirok etish masalalari muhokama qilindi. 

Oʻz oʻrnida, elchi janoblari tomonidan Latviyaning korrupsiyaga qarshi kurashishga masʼul va unda faoliyatini olib boruvchi vakolatli idora va tashkilotlarida stajirovkalarni amalga oshirish taklifi bildirildi. Shuningdek, Riga Oliy yuridik maktabi direktori Agentlik soʻroviga binoan mazkur sohada oʻquv dasturlar ishlab chiqishni maʼlum qildi.

Tadbir yakunida tomonlar Agentlik delegatsiyasining may oyida Latviyaga rejalashtirilayotgan tashrifini amalga oshirishda koʻmaklashish va hamkorlik qilish yuzasidan kelishuvga erishdi.

Korrupsiyaga qarshi kurashish agentligi

Axborot xizmati