Жорий йилнинг 21 июнь куни Коррупцияга қарши курашиш агентлиги директори А.Бурханов ҳамда Бирлашган Миллатлар Ташкилоти Тараққиёт дастури (БМТ ТД)нинг Европа ва МДҲ бўйича минтақавий бюроси директори ўринбосари Марина Уолтер ўртасида учрашув ташкил этилди.

Учрашувнинг асосий мақсади Агентлик ва БМТ ТД ўртасида ҳамкорлик алоқалари ҳолатини муҳокама қилиш, шунингдек, биргаликда амалга ошириладиган тадбир ва лойиҳалар, истиқболдаги режаларни белгилаб олишдан иборат бўлди.

Мулоқот аввалида Агентлик раҳбари Ўзбекистонда коррупцияга қарши курашиш соҳасида амалга оширилаётган сўнгги ислоҳотлар, шу жумладан, БМТ ТД билан йўлга қўйилган тизимли ҳамкорлик натижасида амалга татбиқ этилган янги лойиҳалар, замонавий механизмлар ва уларнинг самаралари ҳақида тўхталиб ўтди.

Таъкидландики, БМТ ТД кўмагида давлат органлари ва ташкилотларида янги тизим — коррупцияга қарши ички назорат тузилмалари (комплаенс-назорат) ташкил этилди. Давлат органлари ва ташкилотларининг коррупцияга қарши курашишдаги самарадорлигини баҳолаш тизими жорий этилди. Шунингдек, коррупцияга оид ҳуқуқбузарликлар ҳақида хабар йўллаш имконини берадиган махсус электрон платформа яратилди.

Айни пайтда эса ҳамкорликда Янги Ўзбекистоннинг тараққиёт стратегияси асосида Коррупцияга қарши курашиш бўйича миллий стратегиянинг янги лойиҳаси устида иш олиб борилмоқда. БМТ ТД томонидан коррупцияга қарши курашишга оид миллий қонунчилик ҳужжатлари ишлаб чиқилиши жараёнида ҳам экспертлик кўмаги кўрсатиб келинмоқда.

Яқинда коррупцияга қарши курашиш ва олдини олиш соҳасида грант таклифлари учун эълон қилинган танлов ҳамкорликнинг яна бир амалий натижасидир.

Ўз навбатида, М.Уолтер томонидан БМТ ТДнинг Ўзбекистондаги ваколатхонаси ва Агентлик ўртасидаги ҳамкорлик доирасида қисқа вақт ичида қўлга киритилган ютуқлар ҳамда мамлакатимизда соҳага оид амалга оширилаётган ислоҳотлар юқори баҳоланди.

- Албатта, бугунга қадар ҳамкорликда эришилган натижалар кўлами жуда кенг, аммо биргаликда амалга оширилиши лозим бўлган вазифалар ҳам ҳали талайгина. Чунки коррупцияга қарши курашишда энг муҳим омил - жамиятда ушбу иллатга нисбатан муросасизликни шакллантириш катта меҳнат ва кўп кўп вақт талаб этади. Биз Коррупцияга қарши қарши курашиш агентлиги орқали Ўзбекистоннинг бу борадаги саъй-ҳаракатларини ҳар томонлама қўллаб-қувватлашда давом этамиз, - деди М. Уолтер.

Мулоқот мобайнида келгусидаги ҳамкорликнинг стратегик йўналишлари ва янги режалари хусусида ўзаро фикр алмашилди.

Якунда Агентлик ва БМТ ТД Ўзбекистонда очиқлик сиёсатини такомиллаштириш, коррупцияга қарши курашиш соҳасига фуқаролик жамияти институтларини фаол жалб этиш, аҳолининг барча қатламлари, шунингдек, давлат хизматчилари, бизнес субъектларининг соҳага оид билим ва кўникмаларини ошириш мақсадида ўқитиш тизимини жорий этиш каби йўналишларда ўзаро алоқаларни янада юқори босқичга олиб чиқишга келишиб олинди.

Коррупцияга қарши курашиш агентлиги

Ахборот хизмати