Joriy yilning 21-iyun kuni Korrupsiyaga qarshi kurashish agentligi direktori A.Burxanov hamda Birlashgan Millatlar Tashkiloti Taraqqiyot dasturi (BMT TD)ning Yevropa va MDH boʻyicha mintaqaviy byurosi direktori oʻrinbosari Marina Uolter oʻrtasida uchrashuv tashkil etildi.

Uchrashuvning asosiy maqsadi Agentlik va BMT TD oʻrtasida hamkorlik aloqalari holatini muhokama qilish, shuningdek, birgalikda amalga oshiriladigan tadbir va loyihalar, istiqboldagi rejalarni belgilab olishdan iborat boʻldi.

Muloqot avvalida Agentlik rahbari Oʻzbekistonda korrupsiyaga qarshi kurashish sohasida amalga oshirilayotgan soʻnggi islohotlar, shu jumladan, BMT TD bilan yoʻlga qoʻyilgan tizimli hamkorlik natijasida amalga tatbiq etilgan yangi loyihalar, zamonaviy mexanizmlar va ularning samaralari haqida toʻxtalib oʻtdi.

Taʼkidlandiki, BMT TD koʻmagida davlat organlari va tashkilotlarida yangi tizim — korrupsiyaga qarshi ichki nazorat tuzilmalari (komplayens-nazorat) tashkil etildi. Davlat organlari va tashkilotlarining korrupsiyaga qarshi kurashishdagi samaradorligini baholash tizimi joriy etildi. Shuningdek, korrupsiyaga oid huquqbuzarliklar haqida xabar yoʻllash imkonini beradigan maxsus elektron platforma yaratildi.

Ayni paytda esa hamkorlikda Yangi Oʻzbekistonning taraqqiyot strategiyasi asosida Korrupsiyaga qarshi kurashish boʻyicha milliy strategiyaning yangi loyihasi ustida ish olib borilmoqda. BMT TD tomonidan korrupsiyaga qarshi kurashishga oid milliy qonunchilik hujjatlari ishlab chiqilishi jarayonida ham ekspertlik koʻmagi koʻrsatib kelinmoqda.

Yaqinda korrupsiyaga qarshi kurashish va oldini olish sohasida grant takliflari uchun eʼlon qilingan tanlov hamkorlikning yana bir amaliy natijasidir.

Oʻz navbatida, M.Uolter tomonidan BMT TDning Oʻzbekistondagi vakolatxonasi va Agentlik oʻrtasidagi hamkorlik doirasida qisqa vaqt ichida qoʻlga kiritilgan yutuqlar hamda mamlakatimizda sohaga oid amalga oshirilayotgan islohotlar yuqori baholandi.

- Albatta, bugunga qadar hamkorlikda erishilgan natijalar koʻlami juda keng, ammo birgalikda amalga oshirilishi lozim boʻlgan vazifalar ham hali talaygina. Chunki korrupsiyaga qarshi kurashishda eng muhim omil - jamiyatda ushbu illatga nisbatan murosasizlikni shakllantirish katta mehnat va koʻp koʻp vaqt talab etadi. Biz Korrupsiyaga qarshi qarshi kurashish agentligi orqali Oʻzbekistonning bu boradagi saʼy-harakatlarini har tomonlama qoʻllab-quvvatlashda davom etamiz, - dedi M. Uolter.

Muloqot mobaynida kelgusidagi hamkorlikning strategik yoʻnalishlari va yangi rejalari xususida oʻzaro fikr almashildi.

Yakunda Agentlik va BMT TD Oʻzbekistonda ochiqlik siyosatini takomillashtirish, korrupsiyaga qarshi kurashish sohasiga fuqarolik jamiyati institutlarini faol jalb etish, aholining barcha qatlamlari, shuningdek, davlat xizmatchilari, biznes subyektlarining sohaga oid bilim va koʻnikmalarini oshirish maqsadida oʻqitish tizimini joriy etish kabi yoʻnalishlarda oʻzaro aloqalarni yanada yuqori bosqichga olib chiqishga kelishib olindi.

Korrupsiyaga qarshi kurashish agentligi

Axborot xizmati