Жорий йилнинг 5 июль куни Сенатнинг Суд-ҳуқуқ масалалари ва коррупцияга қарши курашиш қўмитаси йиғилишида Ўзбекистон Республикасида коррупцияга қарши курашиш тўғрисидаги миллий маъруза дастлабки тарзда муҳокама қилинди.

Маълумки, Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги ПФ-6013-сон Фармонига асосан Коррупцияга қарши курашиш Агентлиги зиммасига ҳар йили оммавий ахборот воситалари орқали эълон қилиниши лозим бўлган Ўзбекистон Республикасида коррупцияга қарши курашиш тўғрисида миллий маърузани тайёрлаш вазифаси юклатилган.

Ушбу вазифани амалга ошириш мақсадида жорий йилда Агентлик томонидан илк (4 та боб, хулоса, таклиф ва тавсиялар қисмидан иборат) Миллий маъруза тайёрланиб, Олий Мажлис палаталарига тегишли тартибда кўриб чиқиш учун киритилди. 

Миллий маъруза кенг жамоатчилик, хусусан, давлат органлари вакиллари, мустақил экспертлар, жамоат фаоллари, олимлар ва фуқароларимиз учун мамлакатимизда коррупцияга қарши курашиш йўналишида олиб борилаётган ишлар бўйича комплекс маълумот беришга мўлжалланган.

Унда 2021 йилда мамлакатимизда коррупцияга қарши курашиш йўналишида кўрилган превентив чоралар, хусусан, давлат органлари ва ташкилотлари, фуқаролик жамияти институтлари ва ОАВ томонидан коррупциянинг олдини олиш бўйича амалга оширилган ишлар тўғрисида батафсил маълумотлар тақдим этилган.  

Таъкидланганидек, 2021 йилда илғор хорижий тажриба асосида коррупцияга оид ҳуқуқбузарлик ҳақида хабар берган ёки коррупцияга қарши курашишга бошқача тарзда кўмаклашган шахсларни ҳимоя қилиш ва рағбатлантириш механизми жорий этилди. Давлат органлари ва ташкилотлари, шу жумладан, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларида коррупцияга қарши ички назорат тузилмалари фаолияти йўлга қўйилди. 

 “Коррупциядан ҳоли қонунчилик” тамойили асосида қонунчилик ҳужжатлари ва уларнинг лойиҳаларини коррупцияга қарши экспертизадан ўтказиш тартиби жорий этилиб, амалдаги норматив-ҳуқуқий ҳужжатлар босқичма-босқич коррупцияга қарши экспертизадан ўтказилиши белгиланди.

Коррупциявий хавф-хатарлар юқори бўлган соҳалар ва тармоқларда “Коррупциясиз соҳа” ва “Коррупциясиз ҳудуд” каби лойиҳалар капитал қурилиш, олий таълим, соғлиқни сақлаш ва давлат харидлари тизимларида амалга оширилмоқда.
Янги таҳрирдаги Ўзбекистон Республикаси “Давлат харидлари тўғрисида”ги Қонуни қабул қилиниб, 2022 йилнинг 1 январдан бошлаб, барча давлат харидларини мажбурий тартибда электрон шаклда ўтказилиши белгиланди. 

Ўзбекистон Республикаси Президентининг 2021 йил 16 июндаги ПФ-6247-сон Фармони билан очиқ маълумотлар сифатида жойлаштирилиши керак бўлган ижтимоий аҳамиятга молик 33 турдаги маълумотларнинг рўйхати тасдиқланди.

Йиғилишда шу каби тизимли ислоҳотларга қарамай, коррупция муаммоси мамлакатимизда ҳамон долзарблигича қолаётганига алоҳида урғу берилди.  

Статистик ҳисоботларга кўра, 2020 йилда Республика бўйича 1 148 та коррупцияга оид жиноят ишлари судга юборилган  бўлса,  2021 йилда бу рақам 3 769 тани ташкил этган. Коррупцияга оид жиноятлар оқибатида давлат ва жамият манфаатларига 2021 йилда 1 трлн 282 млрд сўмлик моддий зарар етказилган.

Қайд этилдики, бу каби салбий ҳолатлар коррупцияга қарши курашиш йўналишида ҳал этилиши лозим бўлган муҳим вазифалар ҳали кўп эканлигидан далолат беради.

Шу нуқтаи назардан Агентлик томонидан Миллий маърузада коррупцияга қарши курашиш ва унинг олдини олиш бўйича бир қатор таклифлар илгари сурилмоқда.  Йиғилишда мазкур таклифлар, уларнинг аҳамияти ва истиқболдаги самараси атрофлича муҳокама қилинди.

Муҳокамалар жараёнида билдирилган фикр-мулоҳазалар, таклиф ва тавсиялар Агентлик томонидан атрофлича ўрганилиб, Миллий маърузани янада такомиллаштирган ҳолда Олий Мажлис палаталари ялпи мажлисига киритиш ҳамда Ўзбекистон Республикаси Президентига тақдим этиш чоралари кўрилади.

Коррупцияга қарши курашиш агентлиги
Ахборот хизмати