Бугун “Тадбиркорлар билан мулоқот ҳафталиги” доирасида бўлиб ўтган “Давлат бошқарув органлари фаолияти ва уларнинг иқтисодиётга аралашуви, коррупция ҳамда бюрократик тўсиқлар” масалалари юзасидан панель сессиясида Коррупцияга қарши курашиш агентлиги директори А.Бурханов иштирок этди.

Сессияда Агентлик директори мамлакатимизда тадбиркорликни ривожлантиришга тўсиқ бўлаётган бюрократия ва коррупциявий омилларни бартараф этишга қаратилган чоралар, яширин иқтисодиёт кўламини қисқартириш бўйича амалга оширилаётган ислоҳотларга тўхталиб  ўтди.

Таъкидланганидек, юртимизда иқтисодий ислоҳотларга ҳамоҳанг равишда коррупциянинг олдини олиш йўналишида ҳам муҳим ўзгаришлар амалга оширилмоқда.

Масалан, давлат хизматларини кўрсатишда ортиқча тартиб-таомилларни қисқартириш, бюрократизм, сансалорлик ва бошқа маъмурий тўсиқларни бартараф этиш мақсадида давлат органлари ва ташкилотлари томонидан 450 дан ортиқ қонун ҳужжатида белгиланган 18 турдаги маълумот ва ҳужжатларни аҳоли ҳамда тадбиркорлардан талаб қилиниши бекор қилиниб, ушбу ҳужжатлар ваколатли давлат органи томонидан “Электрон ҳукумат” платформаси орқали олиш тартиби жорий этилди. Давлат хизматлари марказлари томонидан кўрсатиладиган давлат хизматлари сони 2021 йилда 166 тага етказилди.

Ер ажратиш билан боғлиқ барча истисно ва имтиёзлар тугатилди, ҳоким қарори асосида ерларни тўғридан-тўғри ва текинга бериш амалиёти бутунлай бекор қилинди. Ерларни фақат аукцион орқали сотилиши белгиланди. Тадбиркорлик соҳасида 132 та лицензия ва рухсат бериш тартиб-таомиллари бекор қилинди.

Шунингдек, Агентлик томонидан 117 тадан ортиқ республика даражасидаги давлат ва хўжалик ташкилотларида коррупцияга қарши ички назорат тузилмалари фаолияти йўлга қўйилди.

А.Бурханов ўз нутқида шунингдек, давлат харидлари тизимини янада ривожлантириш, соҳага тадбиркорлик субъектларини кенг жалб қилиш ҳамда очиқлик ва шаффофликни таъминлаш, банкларда коррупцияга қарши курашишга қаратилган бошқа кўплаб ўзгаришларга ҳам тўхталиб ўтди.

Жумладан, қурилиш соҳасида бюрократик тўсиқларни бартараф этиш, соҳага замонавий ахборот-коммуникация технологияларни жорий этиш ва шаффофликни таъминлаш мақсадида “Шаффоф қурилиш” миллий ахборот тизими ишлаб чиқилиб, 2021 йил 1 январдан республиканинг барча ҳудудларида реал вақт режимида тўлиқ ишга туширилди.

БМТнинг коррупцияга қарши конвенцияси талаблари асосида Коррупцияга қарши курашиш миллий кенгаши томонидан тасдиқланган коррупцияга қарши халқаро стандартларни миллий қонунчиликка имплементация қилишни давом эттириш бўйича “Йўл харитаси”нинг ижроси юзасидан “Ўзбекистон бизнесининг коррупцияга қарши курашиш” Хартияси ишлаб чиқилди ва тасдиқланди.

Мазкур Хартия тадбиркорлик субъектининг молиявий фаолиятини бошқариш, шартнома муносабатлари, кадрларни танлаш ва ўқитиш, ички интизом ва қонунийликни мустаҳкамлаш, давлат харидлари каби муҳим йўналишларда коррупция хавфларининг олдини олишга қаратилган комплекс чораларни ўз ичига олган. Бугунги кунда 189 нафар тадбиркорлик субъектлари Хартияга аъзо бўлиб, қонуний фаолиятини юритиб келмоқда.

Давлат бошқаруви органларининг тадбиркорлик субъектлари фаолиятига ноқонуний аралашувларнинг олдини олиш, тадбиркорларни ҳуқуқ ва эркинликларини таъминлаш, фаолиятида коррупциявий омилларга дуч келганда амалий ёрдамлар кўрсатиш юзасидан Агентлик билан Бизнес омбудсман ва Савдо-саноат палатаси ўртасида ўзаро ҳамкорлик тўғрисида битимлар имзоланган.

Сессияда тадбиркорлик субъектлари ўз фаолиятида дуч келаётган тўсиқлар ва  коррупцион ҳолатлар юзасидан тадбиркорларнинг мурожаатлари тингланиб, муаммоларнинг ечими бўйича тегишли ҳуқуқий тушунтириш ва маслаҳатлар берилди. Ўрганиш ва вақт талаб қиладиган мурожаатлар бўйича тадбиркорлардан тегишли тартибда ариза ва шикоятлар қабул қилинди.

Коррупцияга қарши курашиш агентлиги

Ахборот хизмати