Маълумки, 2022 йил 1 сентябрдан бошлаб, давлат ҳокимияти ва бошқаруви органлари, шу жумладан уларнинг ҳудудий бўлинмалари, давлат унитар корхоналари ва муассасалари, давлат улуши 50 фоиздан юқори ташкилотларнинг фаолиятида коррупциявий хавф-хатарларни мажбурий баҳолаш тартиби белгиланди.

Жорий йилнинг 14 сентябрь куни “Ўзбекистонда коррупция хавфи ва ноҳалолликни баҳолаш” мавзусида бўлиб ўтган давра суҳбатида мазкур баҳолаш тартиби ва методологияси тақдимот қилинди.  

Ушбу тадбир “Юксалиш” умуммиллий ҳаракати ва Словениянинг “Минтақавий мулоқот” халқаро нодавлат ташкилоти ҳамкорлигида ташкил этилган АҚШ Давлат департаментининг Халқаро гиёҳвандликка қарши кураш ва ҳуқуқни муҳофаза қилиш фаолияти бюроси (INL) вакили Лиза А.Жонсон хонимнинг Ўзбекистонга ташрифи доирасида ташкил этилди.

Тақдимот мобайнида  Агентлиги масъул ходими Б.Раҳманов томонидан баҳолаш жараёнларини амалга ошириш ва натижаларини кенг жамоатчилик учун очиқ эълон қилиб бориш масалалари бўйича батафсил маълумот берилди. 

Хусусан, жорий йилнинг 31 август куни тасдиқланган Коррупциявий хавф-хатарларни аниқлаш ва баҳолаш услубиёти хусусида атрофлича сўз юритилди. Унга кўра, давлат ташкилоти томонидан коррупциявий хавф-хатарлар ҳар йили 1 мартгача баҳоланади. Давлат ташкилоти фаолиятидаги (вазифа ва функциялардаги) коррупциявий хавф-хатарлар ички ва ташқи ахборот манбалари асосида аниқланиб, коррупциявий хавф-хатарларнинг даражаси паст, ўрта, юқори ўлчовларда баҳоланади.

Коррупциявий хавф-хатарларни аниқлаш ва баҳолаш натижалари асосида давлат ташкилотининг умумлаштирилган коррупциявий хавф-хатарлар харитаси ишлаб чиқилади ва “E-anticor.uz” электрон платформасига ҳар йили 1 февралга қадар киритилади.

Платформада жойлаштирилган давлат ташкилотларининг коррупциявий хавф-хатарлар харита лойиҳалари асосида автоматик равишда коррупцияга мойил бўлган муносабатлар электрон реестри шакллантирилади.

Давлат ташкилоти раҳбари ҳар йили 1 мартгача коррупциявий хавф-хатарлар харитаси ҳамда коррупцияга қарши курашиш бўйича дастурини “E-anticor.uz” электрон платформаси орқали тасдиқлайди. 

Тадбир давомида Коррупцияга қарши курашиш агентлиги, “Юксалиш” умуммиллий ҳаракати ва “Минтақавий мулоқот” халқаро нодавлат ташкилоти (Словения) ҳамкорлигида 2020 йилдан бошлаб амалга ошириб келинаётган “Ўзбекистонда биринчи антикоррупция лабораторияларини яратиш” лойиҳасининг ҳам  тақдимоти бўлиб ўтди. 

Таъкидланганидек, Коррупцияга қарши курашиш лабораторияси ишининг дастлабки экспериментал босқичи болаларни  республика миқёсида бошланғич мактабга қабул қилишда коррупция хавфини ўрганишни ўз ичига олган.

Иккинчи босқичи доирасида давлат-хусусий шериклик (ДХШ) асосида мактабгача таълим муассасаларини ташкил этиш ва фаолиятида ноҳалолликнинг хавф омилларини баҳолаш кўзда тутилган. Тадқиқот еттита тажриба “пилот” ҳудудни ва ДХШ жараёнига жалб қилинган бешта мақсадли аудиторияни – 370 га яқин респондентни қамраб олиш режалаштирилган.

Давра суҳбатида коррупцияга қарши курашишга қаратилган шу каби муҳим тадбирларни амалга оширишда фуқаролик жамиятини кенг жалб қилиш ҳамда ҳамкорликни кенгайтириш имкониятлари юзасидан ўзаро фикр алмашилди. 

Коррупцияга қарши курашиш агентлиги
 Ахборот хизмати