Maʼlumki, 2022-yil 1-sentyabrdan boshlab, davlat hokimiyati va boshqaruvi organlari, shu jumladan ularning hududiy boʻlinmalari, davlat unitar korxonalari va muassasalari, davlat ulushi 50 foizdan yuqori tashkilotlarning faoliyatida korrupsiyaviy xavf-xatarlarni majburiy baholash tartibi belgilandi.

Joriy yilning 14-sentyabr kuni “Oʻzbekistonda korrupsiya xavfi va nohalollikni baholash” mavzusida boʻlib oʻtgan davra suhbatida mazkur baholash tartibi va metodologiyasi taqdimot qilindi.  

 
Ushbu tadbir “Yuksalish” umummilliy harakati va Sloveniyaning “Mintaqaviy muloqot” xalqaro nodavlat tashkiloti hamkorligida tashkil etilgan AQSH Davlat departamentining Xalqaro giyohvandlikka qarshi kurash va huquqni muhofaza qilish faoliyati byurosi (INL) vakili Liza A.Jonson xonimning Oʻzbekistonga tashrifi doirasida tashkil etildi.

Taqdimot mobaynida  Agentligi masʼul xodimi B.Rahmanov tomonidan baholash jarayonlarini amalga oshirish va natijalarini keng jamoatchilik uchun ochiq eʼlon qilib borish masalalari boʻyicha batafsil maʼlumot berildi. 

Xususan, joriy yilning 31-avgust kuni tasdiqlangan Korrupsiyaviy xavf-xatarlarni aniqlash va baholash uslubiyoti xususida atroflicha soʻz yuritildi. Unga koʻra, davlat tashkiloti tomonidan korrupsiyaviy xavf-xatarlar har yili 1-martgacha baholanadi. Davlat tashkiloti faoliyatidagi (vazifa va funksiyalardagi) korrupsiyaviy xavf-xatarlar ichki va tashqi axborot manbalari asosida aniqlanib, korrupsiyaviy xavf-xatarlarning darajasi past, oʻrta, yuqori oʻlchovlarda baholanadi.

Korrupsiyaviy xavf-xatarlarni aniqlash va baholash natijalari asosida davlat tashkilotining umumlashtirilgan korrupsiyaviy xavf-xatarlar xaritasi ishlab chiqiladi va “E-anticor.uz” elektron platformasiga har yili 1-fevralga qadar kiritiladi.

Platformada joylashtirilgan davlat tashkilotlarining korrupsiyaviy xavf-xatarlar xarita loyihalari asosida avtomatik ravishda korrupsiyaga moyil boʻlgan munosabatlar elektron reyestri shakllantiriladi.

Davlat tashkiloti rahbari har yili 1-martgacha korrupsiyaviy xavf-xatarlar xaritasi hamda korrupsiyaga qarshi kurashish boʻyicha dasturini “E-anticor.uz” elektron platformasi orqali tasdiqlaydi. 

Tadbir davomida Korrupsiyaga qarshi kurashish agentligi, “Yuksalish” umummilliy harakati va “Mintaqaviy muloqot” xalqaro nodavlat tashkiloti (Sloveniya) hamkorligida 2020-yildan boshlab amalga oshirib kelinayotgan “Oʻzbekistonda birinchi antikorrupsiya laboratoriyalarini yaratish” loyihasining ham  taqdimoti boʻlib oʻtdi. 

Taʼkidlanganidek, Korrupsiyaga qarshi kurashish laboratoriyasi ishining dastlabki eksperimental bosqichi bolalarni  respublika miqyosida boshlangʻich maktabga qabul qilishda korrupsiya xavfini oʻrganishni oʻz ichiga olgan.

Ikkinchi bosqichi doirasida davlat-xususiy sheriklik (DXSH) asosida maktabgacha taʼlim muassasalarini tashkil etish va faoliyatida nohalollikning xavf omillarini baholash koʻzda tutilgan. Tadqiqot yettita tajriba “pilot” hududni va DXSH jarayoniga jalb qilingan beshta maqsadli auditoriyani – 370 ga yaqin respondentni qamrab olish rejalashtirilgan.

Davra suhbatida korrupsiyaga qarshi kurashishga qaratilgan shu kabi muhim tadbirlarni amalga oshirishda fuqarolik jamiyatini keng jalb qilish hamda hamkorlikni kengaytirish imkoniyatlari yuzasidan oʻzaro fikr almashildi. 

Korrupsiyaga qarshi kurashish agentligi
 Axborot xizmati