Жорий йилнинг 27 сентябрь куни Миллий матбуот марказида “Божхона органларида коррупцияга қарши курашишнинг комплаенс назорат тизими: янгиликлар ва натижалар” мавзусида матбуот анжумани бўлиб ўтди. 

Унда Давлат божхона қўмитаси раҳбарияти, соҳавий бошқарма бошлиқлари билан бир қаторда Коррупцияга қарши курашиш агентлиги вакиллари ҳам иштирок этди.  

Тадбирда Агентлик билан ҳамкорликда божхона тизимини янада ислоҳ қилиш ва коррупциядан ҳоли соҳага айлантириш борасида амалга оширилаётган ишлар хусусида атрофлича маълумот берилди. 

Таъкидланганидек, 2020 йил декабрь ойида Агентлик ва қўмита ўртасида ўзаро ҳамкорлик тўғрисидаги Меморандум имзоланган бўлиб, унинг доирасида ўтган давр мобайнида қўмита фаолиятида коррупциявий хавфлар мавжуд бўлган муносабатларни тартибга солувчи 10 та ички ҳужжатлар қабул қилиниб, коррупцияга қарши ички назорат тузилмаси фаолияти такомиллаштирилди.

Тизимда содир этилган коррупциявий жиноятлар таҳлил қилинди, шу жумладан,  коррупция хавфи юқори бўлган лавозимлар рўйхати шакллантирилиб, уларни минималлаштириш бўйича аниқ чора-тадбирлар кўрилди.

Қўмита фаолиятида манфаатлар тўқнашувини ҳал этишнинг самарали тизими жорий этилди. Натижада 2021 йилда 16 та ҳолат аниқланиб, 13 нафар ходим бошқа лавозимга ва 7 нафари бошқа ҳудудга ротация қилинди.

Қайд этилдики, жорий йил 27 апрель куни қабул қилинган Ўзбекистон Республикаси Президентининг “Божхона маъмуриятчилигини янада такомиллаштиришга доир қўшимча чора-тадбирлар тўғрисида”ги Фармони ижросини таъминлаш бўйича  божхона органларини коррупциядан ҳоли тизимга айлантириш дастури тасдиқланди.

Дастурга биноан 2022 йил 1 сентябрдан халқаро стандартларга мувофиқ комплаенс назорат тизимини тўлақонли ишга тушириш ҳамда ходимларнинг ушбу тизим бўйича билим ва малакасини ошириш йўлга қўйилди. 

Шунингдек, 2022 йил 1 июндан кадрларни очиқлик ва шаффофлик тамойиллари асосида танлаш, бунда, танлов жараёнлари натижаларини Интернет тармоғи орқали реал вақт режимида эълон қилиб борилиши таъминланди.

Агентлик томонидан қўмитанинг Қорақалпоғистон Республикаси, вилоятлар ва Тошкент шаҳри бўйича бошқармалари ҳамда Миллий кинология марказида божхона органлари ходимларини коррупцияга қарши курашиш, манфаатлар тўқнашувининг олдини олиш, одоб-ахлоқ қоидалари бўйича режа-жадвали асосида ўқув курслари ташкил қилинди.

Анжуманда  Агентлик ҳамда қўмита ҳамкорлигида божхона органлари ходимларининг даромадлари ҳамда мол-мулкини декларациялаш амалиёти, божхона органларида коррупцион хавфларни бошқариш, коррупциядан холи божхона қонунчилигини яратиш бўйича келгусида амалга оширилиши режалаштирилаётган ишлар хусусида ҳам тўхталиб ўтилди.  

Коррупцияга қарши курашиш агентлиги
Ахборот хизмати