Joriy yilning 27-sentabr kuni Milliy matbuot markazida “Bojxona organlarida korrupsiyaga qarshi kurashishning komplayens nazorat tizimi: yangiliklar va natijalar” mavzusida matbuot anjumani boʻlib oʻtdi. 

Unda Davlat bojxona qoʻmitasi rahbariyati, sohaviy boshqarma boshliqlari bilan bir qatorda Korrupsiyaga qarshi kurashish agentligi vakillari ham ishtirok etdi.  

Tadbirda Agentlik bilan hamkorlikda bojxona tizimini yanada isloh qilish va korrupsiyadan holi sohaga aylantirish borasida amalga oshirilayotgan ishlar xususida atroflicha maʼlumot berildi. 

Taʼkidlanganidek, 2020-yil dekabr oyida Agentlik va qoʻmita oʻrtasida oʻzaro hamkorlik toʻgʻrisidagi Memorandum imzolangan boʻlib, uning doirasida oʻtgan davr mobaynida qoʻmita faoliyatida korrupsiyaviy xavflar mavjud boʻlgan munosabatlarni tartibga soluvchi 10 ta ichki hujjatlar qabul qilinib, korrupsiyaga qarshi ichki nazorat tuzilmasi faoliyati takomillashtirildi.

Tizimda sodir etilgan korrupsiyaviy jinoyatlar tahlil qilindi, shu jumladan,  korrupsiya xavfi yuqori boʻlgan lavozimlar roʻyxati shakllantirilib, ularni minimallashtirish boʻyicha aniq chora-tadbirlar koʻrildi.

Qoʻmita faoliyatida manfaatlar toʻqnashuvini hal etishning samarali tizimi joriy etildi. Natijada 2021-yilda 16 ta holat aniqlanib, 13 nafar xodim boshqa lavozimga va 7 nafari boshqa hududga rotatsiya qilindi.

Qayd etildiki, joriy yil 27-aprel kuni qabul qilingan Oʻzbekiston Respublikasi Prezidentining “Bojxona maʼmuriyatchiligini yanada takomillashtirishga doir qoʻshimcha chora-tadbirlar toʻgʻrisida”gi Farmoni ijrosini taʼminlash boʻyicha  bojxona organlarini korrupsiyadan holi tizimga aylantirish dasturi tasdiqlandi.

Dasturga binoan 2022-yil 1-sentabrdan xalqaro standartlarga muvofiq komplayens nazorat tizimini toʻlaqonli ishga tushirish hamda xodimlarning ushbu tizim boʻyicha bilim va malakasini oshirish yoʻlga qoʻyildi. 

Shuningdek, 2022-yil 1-iyundan kadrlarni ochiqlik va shaffoflik tamoyillari asosida tanlash, bunda, tanlov jarayonlari natijalarini Internet tarmogʻi orqali real vaqt rejimida eʼlon qilib borilishi taʼminlandi.

Agentlik tomonidan qoʻmitaning Qoraqalpogʻiston Respublikasi, viloyatlar va Toshkent shahri boʻyicha boshqarmalari hamda Milliy kinologiya markazida bojxona organlari xodimlarini korrupsiyaga qarshi kurashish, manfaatlar toʻqnashuvining oldini olish, odob-axloq qoidalari boʻyicha reja-jadvali asosida oʻquv kurslari tashkil qilindi.

Anjumanda  Agentlik hamda qoʻmita hamkorligida bojxona organlari xodimlarining daromadlari hamda mol-mulkini deklaratsiyalash amaliyoti, bojxona organlarida korrupsion xavflarni boshqarish, korrupsiyadan xoli bojxona qonunchiligini yaratish boʻyicha kelgusida amalga oshirilishi rejalashtirilayotgan ishlar xususida ham toʻxtalib oʻtildi.  

Korrupsiyaga qarshi kurashish agentligi
Axborot xizmati