Бугун Қозоғистонда Мустақил Давлатлар Ҳамдўстлиги Давлат раҳбарлари кенгаши доирасида бўлиб ўтган саммит доирасида МДҲ давлатлари ўртасида коррупцияга қарши курашиш соҳасидаги ҳамкорликни янги босқичга олиб чиқиш ҳамда  ҳамкорликнинг механизмларини такомиллаштириш мақсадида Битим имзоланди.

Битим иштирокчи-давлатлар томонидан мувофиқлаштирилган коррупцияга қарши курашиш сиёсатини олиб бориш, қўшма дастур ва тадбирларни амалга ошириш, соҳага оид маълумот алмашиш ва тарғибот ишларида ўзаро ҳамкорлик қилиш вазифаларини ўз ичига олган.

Ҳужжат, шунингдек, коррупциявий жиноятлар бўйича кўмак кўрсатиш, ахборот тизимларини яратиш, тезкор-қидирув фаолиятни амалга ошириш ҳамда кадрлар малакасини оширишда ҳамкорлик қилиш йўналишларини қамраб олади.

  МДҲ доирасидаги Битим БМТ Коррупцияга қарши конвенциясига мос равишда пора олиш, пора бериш, Ҳокимият ёки мансаб ваколатини суиистеъмол қилиш ва мансаб ваколати доирасидан четга чиқиш ҳамда хизмат мавқеидан фойдаланган ҳолда талон-торож қилишларни коррупциявий жиноят деб эътироф этади.

Эътиборли жиҳати, Битим иштирокчи-давлатларнинг ваколатли органлари томонидан ўзаро кўмак кўрсатиш механизмини жорий этиб, коррупциявий жиноятлар доирасида гумонланувчи ва бошқа жиноятга алоқадор шахсларнинг, шунингдек жиноят оқибатида орттирилган мол-мулкнинг жойини аниқлаш ва бош процессуал чораларни кўриш бўйича ҳамкорликни назарда тутади.

Коррупцияга қарши курашиш агентлиги

Ахборот хизмати