Bugun Qozog‘istonda Mustaqil Davlatlar Hamdo‘stligi Davlat rahbarlari kengashi doirasida bo‘lib o‘tgan sammit doirasida MDH davlatlari o‘rtasida korrupsiyaga qarshi kurashish sohasidagi hamkorlikni yangi bosqichga olib chiqish hamda  hamkorlikning mexanizmlarini takomillashtirish maqsadida Bitim imzolandi.

Bitim ishtirokchi-davlatlar tomonidan muvofiqlashtirilgan korrupsiyaga qarshi kurashish siyosatini olib borish, qo‘shma dastur va tadbirlarni amalga oshirish, sohaga oid maʼlumot almashish va targ‘ibot ishlarida o‘zaro hamkorlik qilish vazifalarini o‘z ichiga olgan.

Hujjat, shuningdek, korrupsiyaviy jinoyatlar bo‘yicha ko‘mak ko‘rsatish, axborot tizimlarini yaratish, tezkor-qidiruv faoliyatni amalga oshirish hamda kadrlar malakasini oshirishda hamkorlik qilish yo‘nalishlarini qamrab oladi.

  MDH doirasidagi Bitim BMT Korrupsiyaga qarshi konvensiyasiga mos ravishda pora olish, pora berish, Hokimiyat yoki mansab vakolatini suiisteʼmol qilish va mansab vakolati doirasidan chetga chiqish hamda xizmat mavqeidan foydalangan holda talon-toroj qilishlarni korrupsiyaviy jinoyat deb eʼtirof etadi.

Eʼtiborli jihati, Bitim ishtirokchi-davlatlarning vakolatli organlari tomonidan o‘zaro ko‘mak ko‘rsatish mexanizmini joriy etib, korrupsiyaviy jinoyatlar doirasida gumonlanuvchi va boshqa jinoyatga aloqador shaxslarning, shuningdek jinoyat oqibatida orttirilgan mol-mulkning joyini aniqlash va bosh protsessual choralarni ko‘rish bo‘yicha hamkorlikni nazarda tutadi.

Korrupsiyaga qarshi kurashish agentligi

Axborot xizmati