Жорий йил 14 октябрь куни Коррупцияга қарши курашиш агентлиги ҳамда Тожикистон Республикаси Давлат молиявий назорати ва коррупцияга қарши курашиш агентлиги ўртасида онлайн учрашув ташкил этилди.

Маълумот учун: 2021 йил 16 июнь куни Тошкент шаҳрида бўлиб ўтган ИҲТга аъзо давлатлар коррупцияга қарши курашиш идоралари раҳбарлари ва омбудсманларининг 4-йиғилиши доирасида ташкил этилган икки томонлама учрашувда Тожикистон билан икки томонлама ҳамкорлик Меморандуми имзоланган ва мазкур Меморандумни 2022-2023 йилларда амалга ошириш бўйича ҳамкорлик дастури тасдиқланган.

Учрашув икки давлат коррупцияга қарши курашиш идоралари масъул вакиллари иштирокида бўлиб ўтди. 

Агентлик ходимлари томонидан коррупцияга қарши курашишда ахборот технологияларидан фойдаланишда Ўзбекистон тажрибаси, шу жумладан, Агентлик томонидан ишлаб чиқилаётган дастурлар, хусусан, коррупциявий хавф-хатарларни баҳолаш бўйича ““Eanticor.uz” платформаси,“Deklaratsiya” электрон ахборот тизими, Коррупцияга оид жиноятларни содир этишда айбдор деб топилган шахсларнинг очиқ электрон реестри, фуқароларнинг коррупция ҳақида тезкор хабар бериш имконини берувчи “Call-марказ”, “Коррупцияга қарши курашиш виртуал академияси” ўқув платформаси, давлат харидлари жараёнларини рақамлаштириш бўйича олиб борилган ишлар тўғрисида маълумот берилди.

Шундан сўнг, Тожикистон Республикаси Агентлиги вакиллари томонидан коррупцияга қарши курашишда IT-технологияларни қўллашга оид Тожикистонда олиб борилган ишлар, шу жумладан, Агентликнинг янгиланган сайти ишга туширилганлиги, ҳужжатлар айланишини тўлиқ рақамлаштириш, ижтимоий тармоқларда фаол аксилкоррупция кампанияси фаолияти, ЙХҲТ билан ҳамкорликда коррупцияга оид маъмурий ва жиноий жавобгарликка тортилган шахсларнинг онлайн электрон реестри шакллантирилаётганлиги ҳақида маълумотлар берилди.

Шунингдек, Тожикистон томони коррупциявий хавф-хатарларни баҳолаш Ўзбекистонда электрон платформа орқали амалга оширилишини ижобий эътироф этиб, ушбу тажрибани Тожикистонга жорий этишга қизиқиш билдиришди. 

Учрашув якунида томонлар  келгусида Меморандумда белгиланган масалаларда ва бошқа йўналишларда ҳамкорликни давом эттириш ҳамда кенгайтиришга келишиб олдилар.

Тожикистон Агентлиги вакиллари жорий йилнинг декабрь ойида Ўзбекистон Коррупсияга қарши курашиш агентлиги делегациясининг мазкур давлатга ташрифини ташкил этиш юзасидан ўз таклиф ҳамда фикр-мулоҳазаларини билдиришди.

Коррупцияга қарши курашиш агентлиги 
Ахборот хизмати