Joriy yil 14-oktabr kuni Korrupsiyaga qarshi kurashish agentligi hamda Tojikiston Respublikasi Davlat moliyaviy nazorati va korrupsiyaga qarshi kurashish agentligi o‘rtasida onlayn uchrashuv tashkil etildi.

Ma’lumot uchun: 2021-yil 16-iyun kuni Toshkent shahrida bo‘lib o‘tgan IHTga a’zo davlatlar korrupsiyaga qarshi kurashish idoralari rahbarlari va ombudsmanlarining 4-yig‘ilishi doirasida tashkil etilgan ikki tomonlama uchrashuvda Tojikiston bilan ikki tomonlama hamkorlik Memorandumi imzolangan va mazkur Memorandumni 2022-2023-yillarda amalga oshirish bo‘yicha hamkorlik dasturi tasdiqlangan.

Uchrashuv ikki davlat korrupsiyaga qarshi kurashish idoralari mas'ul vakillari ishtirokida bo'lib o'tdi. 

Agentlik xodimlari tomonidan korrupsiyaga qarshi kurashishda axborot texnologiyalaridan foydalanishda O‘zbekiston tajribasi, shu jumladan Agentlik tomonidan ishlab chiqilayotgan dasturlar, xususan, korrupsiyaviy xavf-xatarlarni baholash bo'yicha “E-anticor.uz” platformasi, “Deklaratsiya” elektron axborot tizimi, Korrupsiyaga oid jinoyatlarni sodir etishda aybdor deb topilgan shaxslarning ochiq elektron reyestri, fuqarolarning korrupsiya haqida tezkor xabar berish imkonini beruvchi “Call-markaz”, “Korrupsiyaga qarshi kurashish virtual akademiyasi” o‘quv platformasi, davlat xaridlari jarayonlarini raqamlashtirish bo‘yicha olib borilgan ishlar to‘g‘risida ma’lumot berildi.

Shundan so‘ng, Tojikiston Respublikasi Agentligi vakillari tomonidan korrupsiyaga qarshi kurashishda IT-texnologiyalarni qo‘llashga oid Tojikistonda olib borilgan ishlar, shu jumladan, Agentlikning yangilangan sayti ishga tushirilganligi, hujjatlar aylanishini to‘liq raqamlashtirish, ijtimoiy tarmoqlarda faol aksilkorrupsiya kampaniyasi faoliyati, YXHT bilan hamkorlikda korrupsiyaga oid ma’muriy va jinoiy javobgarlikka tortilgan shaxslarning onlayn elektron reyestri shakllantirilayotganligi haqida ma’lumotlar berildi.

Shuningdek, Tojikiston tomoni korrupsiyaviy xavf-xatarlarni baholash O‘zbekistonda elektron platforma orqali amalga oshirilishini ijobiy e’tirof etib, ushbu tajribani Tojikistonga joriy etishga qiziqish bildirishdi. 

Uchrashuv yakunida tomonlar  kelgusida Memorandumda belgilangan masalalarda va boshqa yo‘nalishlarda hamkorlikni davom ettirish hamda kengaytirishga kelishib oldilar.

Tojikiston Agentligi vakillari joriy yilning dekabr oyida O'zbekiston Korrupsiyaga qarshi kurashish agentligi delegatsiyasining mazkur davlatga tashrifini tashkil etish yuzasidan o'z taklif hamda fikr-mulohazalarini bildirishdi.

Korrupsiyaga qarshi kurashish agentligi 
Axborot xizmati