Жорий йилнинг 10 ноябрь куни Коррупцияга қарши курашиш агентлигида тадбиркорлар билан «Бизнес — коррупцияга қарши» мавзусида мулоқот бўлиб ўтди.

Тадбир Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил (Бизнес-омбудсман) ва Савдо-саноат палатаси ҳамкорлигида БМТнинг Гиёҳванд моддалар ва жиноятчилик бўйича минтақавий бошқармаси кўмагида ташкил этилди. 

Унда турли соҳаларда фаолият кўрсатаётган тадбиркорлик субъектлари ва бизнес вакиллари, вазирлик ва идоралар, ОАВ, жамоатчилик ва халқаро ташкилотларнинг ходимлари иштирок этди.

Тадбирдан кўзланган асосий мақсад мамлакатимизда коррупцияга карши курашиш, давлат органлари фаолиятида ҳалоллик ва шаффофликни таъминлаш бўйича амалга оширилаётган ислоҳотларнинг мазмун-моҳиятини  тадбиркорлик субъектларига етказиш, тадбиркорлар билан тўғридан-тўғри мулоқотни йўлга қўйиш ҳамда соҳадаги мавжуд муаммолар бўйича фикр-мулоҳазаларни ўрганишдан иборат бўлди.

Таъкидланганидек, тадбиркорликнинг эркин ривожланиши, бизнесда барча учун тенг имконият ва шарт-шароитлар яратишга тўсқинлик қилувчи коррупцион омиллар ва ҳолатларни бартараф этиш коррупцияга қарши курашиш ва унинг олдини олишнинг муҳим йўналишларидан бири саналади.

Шу боис мамлакатимизда бизнесни ҳар томонлама қўллаб-вувватлаш, иқтисодиётни янада барқарорлаштириш ва либераллаштириш,  иқтисодиётимизда кичик бизнеснинг салоҳиятини янада ошириш масаласига катта эътибор қаратилмоқда.

Жумладан, Президентимиз ташаббуси билан бундан 5 йил аввал тадбиркорлик субъектлари фаолиятида текширишлар ўтказишга мораторий эълон қилингани натижасида сўнгги беш йилда 400 мингдан ортиқ янги кичик бизнес субъектлари ташкил этилди. Бу даврда тадбиркорлик фаолиятини текширишда бюрократик омиллар ва эскирган талаблардан воз кечиб, замон талабларига мос адолатли ва шаффоф механизмлар ҳам жорий этилди.

Тадбиркорларнинг ҳуқуқлари ва қонуний манфаатларини муҳофаза қилишни кучайтириш мақсадида самарали тузилмалар шакллантирилди.

Давлат раҳбарининг ташаббуси билан тадбиркорлар билан “Очиқ мулоқот” ўтказилиши анъана тусига кирди.  Жумладан, жорий йил 22 августда тадбиркорлар билан ўтказилган “Очиқ мулоқот”да белгилаб берилган вазифаларни амалга ошириш бўйича “Йўл харитаси” (30.08.2022й. ПҚ–364-сон қарор) қабул қилинган.

“Йўл харитаси”да белгиланган топшириқлар асосида тадбиркорликка янгилликлар яратиш мақсадида 8 та Президент Фармони ва қарори, 1 та Ҳукумат қарор қабул қилинди.

Мулоқотлар мобайнида 2021 йилнинг ноябрь ойида Коррупцияга қарши курашиш агентлиги, Бизнес-омбудсман ҳамда Савдо-саноат палатаси ҳамкорлигида ўтказилган “Ўзбекистон бизнес ҳамжамиятида ҳалоллик” бизнес форуми натижалари ҳамда Форум доирасида қабул қилинган “Коррупцияга қарши курашиш хартияси” хусусида ҳам атрофлича тўхталиб ўтилди.  

Қайд этилганидек, Хартия  тадбиркорлик субъектининг молиявий фаолиятини бошқариш, шартнома муносабатлари, кадрларни танлаш ва ўқитиш, ички интизом ва қонунийликни мустаҳкамлаш, давлат харидлари каби муҳим йўналишларда коррупция хавфларининг олдини олишга қаратилган комплекс чораларни ўз ичига олади.

Хартия нормаларининг амалиётга жорий этилиши хусусий секторда коррупцияни олдини олиш, мамлакатнинг инвестициявий жозибадорлигини ошириш, “ҳалол” тадбикорларни рағбатлантириш тизимини жорий этиш имконини бермоқда.

Хартия қоидаларини амалга ошириш мақсадида Савдо-саноат палатаси томонидан “Хартияга қўшилиш ва Хартия аъзоларининг Ягона Реестрини юритиш тартиби тўғрисида” Низом ишлаб чиқилди ҳамда ушбу Низом ҳам Коррупцияга қарши курашиш агентлиги, Савдо-саноат палатаси ҳамда Бизнес-омбудсман нинг қўшма қарори билан тасдиқланди. 

Низомда тадбиркорлик субъектлари томонидан Хартияга қўшилиш, маълумотларни электрон “ягона реестр”да акс эттириш ва реестрдан чиқариш тартиби аниқ белгилаб берилди.

Реестрни юритишга Савдо-саноат палатаси масъул этиб белгиланиб, коррупцияга қарши чораларни самарали жорий этган тадбиркорлик субъектларига сертификат топшириш йўлга қўйилди.

Ўтган давр мобайнида мазкур Хартия аҳамияти тўғрисида тадбиркорлар ўртасида бир қатор тизимли ишлар амалга оширилди ва натижада қисқа вақт давомида Хартияга 189 нафар тадбиркор қўшилиб, коррупциядан холи равишда бизнес юритиш вазифасини ўз зиммасига олди.

Тадбирда бизнес вакиллари фаолиятида коррупция хавфларининг олдини олиш учун яратиб берилаётган шу каби муҳим имкониятлар ҳамда хусусий секторда коррупцияга қарши курашиш тизимини янада такомиллаштириш юзасидан ўзаро фикр алмашилди.

Бизнес соҳасида коррупциянинг ҳар қандай кўринишлари ва бошқа қонун бузилишлар сабаблари ва шарт-шароитларини аниқлаш, соҳадаги коррупция ҳолати тизимли таҳлилини амалга ошириш ҳамда коррупцияга оид ҳуқуқбузарликлар содир этилишининг олдини олиш, ҳалоллик ва бизнесга ишончни кучайтириш масалалари ҳам муҳокамалар марказида бўлди.

Якунда тадбиркорлик субъектлари ҳамда экспертлар томонидан билдирилган фикр-мулоҳазалар, тавсиялар асосида хусусий секторда коррупцияга қарши курашиш тизимини янада такомиллаштиришга доир амалий таклифлар ишлаб чиқилди.

Коррупцияга қарши курашиш агентлиги

Ахборот хизмати