Joriy yilning 10 noyabr kuni Korrupsiyaga qarshi kurashish agentligida tadbirkorlar bilan “Biznes — korrupsiyaga qarshi” mavzusida muloqot boʻlib oʻtdi.

Tadbir Tadbirkorlik sub'yektlarining huquqlari va qonuniy manfaatlarini himoya qilish boʻyicha vakil (Biznes-ombudsman) va Savdo-sanoat palatasi hamkorligida BMTning Giyohvand moddalar va jinoyatchilik boʻyicha mintaqaviy boshqarmasi koʻmagida tashkil etildi. 

Unda turli sohalarda faoliyat ko‘rsatayotgan tadbirkorlik subyektlari va biznes vakillari, vazirlik va idoralar, OAV, jamoatchilik va xalqaro tashkilotlarning xodimlari ishtirok etdi.

Tadbirdan ko‘zlangan asosiy maqsad mamlakatimizda korrupsiyaga karshi kurashish, davlat organlari faoliyatida halollik va shaffoflikni taʼminlash bo‘yicha amalga oshirilayotgan islohotlarning mazmun-mohiyatini  tadbirkorlik subyektlariga yetkazish, tadbirkorlar bilan to‘g‘ridan-to‘g‘ri muloqotni yo‘lga qo‘yish hamda sohadagi mavjud muammolar bo‘yicha fikr-mulohazalarni o‘rganishdan iborat bo‘ldi.

Taʼkidlanganidek, tadbirkorlikning erkin rivojlanishi, biznesda barcha uchun teng imkoniyat va shart-sharoitlar yaratishga to‘sqinlik qiluvchi korrupsion omillar va holatlarni bartaraf etish korrupsiyaga qarshi kurashish va uning oldini olishning muhim yo‘nalishlaridan biri sanaladi.

Shu bois mamlakatimizda biznesni har tomonlama qo‘llab-vuvvatlash, iqtisodiyotni yana-da barqarorlashtirish va liberallashtirish,  iqtisodiyotimizda kichik biznesning salohiyatini yana-da oshirish masalasiga katta eʼtibor qaratilmoqda.

Jumladan, Prezidentimiz tashabbusi bilan bundan 5 yil avval tadbirkorlik subyektlari faoliyatida tekshirishlar o‘tkazishga moratoriy eʼlon qilingani natijasida so‘nggi besh yilda 400 mingdan ortiq yangi kichik biznes subyektlari tashkil etildi. Bu davrda tadbirkorlik faoliyatini tekshirishda byurokratik omillar va eskirgan talablardan voz kechib, zamon talablariga mos adolatli va shaffof mexanizmlar ham joriy etildi.

Tadbirkorlarning huquqlari va qonuniy manfaatlarini muhofaza qilishni kuchaytirish maqsadida samarali tuzilmalar shakllantirildi.

Davlat rahbarining tashabbusi bilan tadbirkorlar bilan “Ochiq muloqot” o‘tkazilishi anʼana tusiga kirdi.  Jumladan, joriy yil 22 avgustda tadbirkorlar bilan o‘tkazilgan “Ochiq muloqot”da belgilab berilgan vazifalarni amalga oshirish bo‘yicha “Yo‘l xaritasi” (30.08.2022y. PQ–364-son qaror) qabul qilingan.

“Yo‘l xaritasi”da belgilangan topshiriqlar asosida tadbirkorlikka yangilliklar yaratish maqsadida 8 ta Prezident Farmoni va qarori, 1 ta Hukumat qaror qabul qilindi.

Muloqotlar mobaynida 2021 yilning noyabr oyida Korrupsiyaga qarshi kurashish agentligi, Biznes-ombudsman hamda Savdo-sanoat palatasi hamkorligida o‘tkazilgan “O‘zbekiston biznes hamjamiyatida halollik” biznes forumi natijalari hamda Forum doirasida qabul qilingan “Korrupsiyaga qarshi kurashish xartiyasi” xususida ham atroflicha to‘xtalib o‘tildi.  

Qayd etilganidek, Xartiya  tadbirkorlik subyektining moliyaviy faoliyatini boshqarish, shartnoma munosabatlari, kadrlarni tanlash va o‘qitish, ichki intizom va qonuniylikni mustahkamlash, davlat xaridlari kabi muhim yo‘nalishlarda korrupsiya xavflarining oldini olishga qaratilgan kompleks choralarni o‘z ichiga oladi.

Xartiya normalarining amaliyotga joriy etilishi xususiy sektorda korrupsiyani oldini olish, mamlakatning investitsiyaviy jozibadorligini oshirish, “halol” tadbikorlarni rag‘batlantirish tizimini joriy etish imkonini bermoqda.

Xartiya qoidalarini amalga oshirish maqsadida Savdo-sanoat palatasi tomonidan “Xartiyaga qo‘shilish va Xartiya aʼzolarining Yagona Reyestrini yuritish tartibi to‘g‘risida” Nizom ishlab chiqildi hamda ushbu Nizom ham Korrupsiyaga qarshi kurashish agentligi, Savdo-sanoat palatasi hamda Biznes-ombudsman ning qo‘shma qarori bilan tasdiqlandi. 

Nizomda tadbirkorlik subyektlari tomonidan Xartiyaga qo‘shilish, maʼlumotlarni elektron “yagona reyestr”da aks ettirish va reyestrdan chiqarish tartibi aniq belgilab berildi.

Reyestrni yuritishga Savdo-sanoat palatasi masʼul etib belgilanib, korrupsiyaga qarshi choralarni samarali joriy etgan tadbirkorlik subyektlariga sertifikat topshirish yo‘lga qo‘yildi.

O‘tgan davr mobaynida mazkur Xartiya ahamiyati to‘g‘risida tadbirkorlar o‘rtasida bir qator tizimli ishlar amalga oshirildi va natijada qisqa vaqt davomida Xartiyaga 189 nafar tadbirkor qo‘shilib, korrupsiyadan xoli ravishda biznes yuritish vazifasini o‘z zimmasiga oldi.

Tadbirda biznes vakillari faoliyatida korrupsiya xavflarining oldini olish uchun yaratib berilayotgan shu kabi muhim imkoniyatlar hamda xususiy sektorda korrupsiyaga qarshi kurashish tizimini yana-da takomillashtirish yuzasidan o‘zaro fikr almashildi.

Biznes sohasida korrupsiyaning har qanday ko‘rinishlari va boshqa qonun buzilishlar sabablari va shart-sharoitlarini aniqlash, sohadagi korrupsiya holati tizimli tahlilini amalga oshirish hamda korrupsiyaga oid huquqbuzarliklar sodir etilishining oldini olish, halollik va biznesga ishonchni kuchaytirish masalalari ham muhokamalar markazida bo‘ldi.

Yakunda tadbirkorlik subyektlari hamda ekspertlar tomonidan bildirilgan fikr-mulohazalar, tavsiyalar asosida xususiy sektorda korrupsiyaga qarshi kurashish tizimini yana-da takomillashtirishga doir amaliy takliflar ishlab chiqildi.

Korrupsiyaga qarshi kurashish agentligi

Axborot xizmati