Мамлакатимизда савдони либераллаштириш, иқтисодиётнинг рақобатбардошлигини ошириш ҳамда мулк ҳуқуқини муҳофаза қилишга қаратилган тизимли ислоҳотлар натижасида сўнгги йилларда инвестиция муҳити яхшиланди. Натижада иқтисодиёт тармоқлари ва ҳудудларга тўғридан-тўғри сармоялар фаол кириб келмоқда.

Жумладан, 2021 йил давомида хорижий инвесторлар иштирокида 35 та йирик ва муҳим лойиҳалар амалга оширилди ҳамда жами 4,3 млрд АҚШ доллари миқдорида инвестициялар жалб этилди.

Жорий йилнинг март ойида ташкил этилган Тошкент халқаро инвестиция форумида 7,8 млрдлик шартнома ва битимлар имзоланди.

Инвестицияларнинг самарадорлигини таъминлаш, уларни жалб этишдан кўзланган асосий мақсадларга эришиш учун лойиҳаларини амалга ошириш ҳолати, маблағларнинг ўзлаштириш натижаларини таҳлил қилиб борииш, барча жараёнлар очиқ ва шаффоф ташкил этилиши мақсадга мувофиқ.

Маълумки, Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги ПФ-6013-сон Фармонига асосан Коррупцияга қарши курашиш агентлигига инвестиция лойиҳаларининг амалга оширилиши ва давлат дастурлари бажарилиши билан боғлиқ материалларни талаб қилиш, олиш ва ўрганиш ваколати берилган.

Шунингдек, ўтган давр мобайнида Ўзбекистон Республикаси Президентининг бир қатор қарорлари билан Агентлик зиммасига йирик ва муҳим инвестиция лойиҳалари бўйича ажратилган маблағларнинг мақсадли ишлатилиши жараёнида очиқлик ва ошкораликни таъминлаш устидан доимий назорат ўрнатиш вазифаси юклатилди.

Шу муносабат билан Агентлик томонидан мазкур инвестиция лойиҳаларини амалга ошириш жараёнларида очиқлик ва ошкораликни таъминлаш юзасидан доимий назорат тадбирлари олиб борилмоқда.

Жумладан, масъул давлат органлари ва ташкилотлари томонидан лойиҳалар доирасида амалга оширилиши режалаштирилган ишларнинг барча босқичларини кенг жамоатчиликка очиқ эълон қилиб борилиши, шу жумладан, режалаштирилган иш ҳажми ва эришиладиган натижалар, ажратилган кредит маблағлари ва ундаги халқаро молия институтларининг улуши ва бошқа маълумотлар, лойиҳани амалга ошириш доирасида қабул қилинган ҳужжатларнинг очиқлиги ўтказилган тендер ва танловлар тўғрисидаги маълумотларнинг  расмий веб-сайт ва бошқа ахборот ресурсларига жойлаштирилиши мониторинг қилинмоқда.

Шунингдек, лойиҳалар доирасида амалга ошилган ишлар, айниқса, маблағларнинг мақсадли ишлатилиши жойларга чиққан ҳолда ўрганилмоқда.

Жумладан, Ўзбекистон Республикаси Президентининг 2020 йил 25 ноябрдаги ПҚ-4898-сон Қарори билан ишга туширилган Жаҳон банкининг Халқаро тараққиёт уюшмаси ва Осиё инфратузилма инвестициялари банки иштирокидаги “Қишлоқ инфратузилмасини ривожлантириш” лойиҳаси юзасидан амалга оширилган ишлар билан танишиш мақсадида Агентлик раҳбарияти ҳамда лойиҳа вакиллари ўртасида учрашув ташкил этилиб, Андижон, Наманган ва Фарғона вилоятларида амалга оширилган ишлар юзасидан тақдимот ташкил этилди.

Лойиҳа доирасида 300 ортиқ объектларни қуриш ёки реконструкция қилиш назарда тутилган бўлиб, ижтимоий объектларни танлаш жараёни шаффоф ва очиқ ўтказилишини таъминлаш мақсадида лойиҳага маҳаллий нодавлат нотижорат ташкилотлари ҳам жалб этилган. Лойиҳага оид маълумотлар ҳамда олиб борилаётган ишлар юзасидан Лойиҳанинг расмий веб-сайти, телеграм ва фейсбук каналлари, Иқтисодий тараққиёт ва камбағалликни қисқартириш вазирлиги расмий веб-сайти ҳамда бир қатор бошқа босма ва электрон оммавий ахборот воситаларида доимий маълумотлар бериб борилмоқда.

Ўзбекистон Республикаси Президентининг 2022 йил 18 мартдаги ПҚ-171-сон Қарорига асосан “Навоий вилояти Кармана туманида оқова сув тизимларини қуриш” ҳамда “Қашқадарё вилояти Шаҳрисабз шаҳри ва Китоб тумани марказида оқова сув тизимларини реконструкция қилиш ва қуриш” лойиҳалари бўйича олиб борилаётган ишлар юзасидан “Ўзсувтаъминот” АЖ ҳамда Франция Тараққиёт агентлиги билан ҳамкорлик ўрнатилган бўлиб, лойиҳа тўғрисидаги маълумотлар “Ўзсувтаъминот” Ажнинг расмий сайтларида эълон қилиб борилмоқда.

Лойиҳа доирасида Китоб тумани марказида истиқомат қилувчи 53,7 минг нафар, Шаҳрисабз шаҳридаги 150,7 минг нафар аҳолининг оқова сув таъминоти яхшиланади.

Жорий йилнинг 25 март куни Ўзбекистон Республикаси ва Франция тараққиёт агентлиги ўртасида Қарз битими имзоланди. Бугунги кунда лойиҳани амалга ошириш гуруҳини ташкил қилиш бўйича ишлар олиб борилмоқда.

Бўш иш ўринлари https://uzsuv.uz/ru/vacant ва https://uzjobs.uzсайтларида эълон қилинди.

Ўзбекистон Республикаси Президентининг 2022 йил 4 апрелдаги ПҚ-189-сон Қарорига асосан “Миллий автомобиль йўлларини ривожлантириш” лойиҳаси доирасида Бухоро ва Сурхондарё вилоятларида умумий қиймати 273,8 млн АҚШ долларига тенг бўлган автомобиль йўлларини реконструкция қилиш дастурлари ишлаб чиқилган.

Мазкур лойиҳа юзасидан батафсил маълумотлар Ўзбекистон автомобиль йўллари қўмитасининг расмий веб-сайтида жойлаштирилиши таъминланди.

Агентлик томонидан лойиҳалар доирасида ажратилган маблағларнинг мақсадли ишлатилиши жараёнида очиқлик ва ошкораликни таъминлаш устидан назорат ишлари давом эттирилади.

Коррупцияга қарши курашиш агентлиги

Ахборот хизмати