Mamlakatimizda savdoni liberallashtirish, iqtisodiyotning raqobatbardoshligini oshirish hamda mulk huquqini muhofaza qilishga qaratilgan tizimli islohotlar natijasida so‘nggi yillarda investitsiya muhiti yaxshilandi. Natijada iqtisodiyot tarmoqlari va hududlarga to‘g‘ridan-to‘g‘ri sarmoyalar faol kirib kelmoqda.

Jumladan, 2021-yil davomida xorijiy investorlar ishtirokida 35 ta yirik va muhim loyihalar amalga oshirildi hamda jami 4,3 mlrd AQSh dollari miqdorida investitsiyalar jalb etildi.

Joriy yilning mart oyida tashkil etilgan Toshkent xalqaro investitsiya forumida 7,8 mlrdlik shartnoma va bitimlar imzolandi.

Investitsiyalarning samaradorligini ta’minlash, ularni jalb etishdan ko‘zlangan asosiy maqsadlarga erishish uchun loyihalarini amalga oshirish holati, mablag‘larning o‘zlashtirish natijalarini tahlil qilib boriish, barcha jarayonlar ochiq va shaffof tashkil etilishi maqsadga muvofiq.

Ma’lumki, O‘zbekiston Respublikasi Prezidentining 2020-yil 29-iyundagi “O‘zbekiston Respublikasida korrupsiyaga qarshi kurashish tizimini takomillashtirish bo‘yicha qo‘shimcha chora-tadbirlar to‘g‘risida”gi PF-6013-son Farmoniga asosan Korrupsiyaga qarshi kurashish agentligiga investitsiya loyihalarining amalga oshirilishi va davlat dasturlari bajarilishi bilan bog‘liq materiallarni talab qilish, olish va o‘rganish vakolati berilgan.

Shuningdek, o‘tgan davr mobaynida O‘zbekiston Respublikasi Prezidentining bir qator qarorlari bilan Agentlik zimmasiga yirik va muhim investitsiya loyihalari bo‘yicha ajratilgan mablag‘larning maqsadli ishlatilishi jarayonida ochiqlik va oshkoralikni ta’minlash ustidan doimiy nazorat o‘rnatish vazifasi yuklatildi.

Shu munosabat bilan Agentlik tomonidan mazkur investitsiya loyihalarini amalga oshirish jarayonlarida ochiqlik va oshkoralikni ta’minlash yuzasidan doimiy nazorat tadbirlari olib borilmoqda.

Jumladan, mas’ul davlat organlari va tashkilotlari tomonidan loyihalar doirasida amalga oshirilishi rejalashtirilgan ishlarning barcha bosqichlarini keng jamoatchilikka ochiq e’lon qilib borilishi, shu jumladan, rejalashtirilgan ish hajmi va erishiladigan natijalar, ajratilgan kredit mablag‘lari va undagi xalqaro moliya institutlarining ulushi va boshqa ma’lumotlar,l oyihani amalga oshirish doirasida qabul qilingan hujjatlarning ochiqligi o‘tkazilgan tender va tanlovlar to‘g‘risidagi ma’lumotlarning  rasmiy veb-sayt va boshqa axborot resurslariga joylashtirilishi monitoring qilinmoqda.

Shuningdek, loyihalar doirasida amalga oshilgan ishlar, ayniqsa, mablag‘larning maqsadli ishlatilishi joylarga chiqqan holda o‘rganilmoqda.

Jumladan, O‘zbekiston Respublikasi Prezidentining 2020-yil 25-noyabrdagi PQ-4898-son Qarori bilan ishga tushirilgan Jahon bankining Xalqaro taraqqiyot uyushmasi va Osiyo infratuzilma investitsiyalari banki ishtirokidagi “Qishloq infratuzilmasini rivojlantirish” loyihasi yuzasidan amalga oshirilgan ishlar bilan tanishish maqsadida Agentlik rahbariyati hamda loyiha vakillari o‘rtasida uchrashuv tashkil etilib, Andijon, Namangan va Farg‘ona viloyatlarida amalga oshirilgan ishlar yuzasidan taqdimot tashkil etildi.

Loyiha doirasida 300 ortiq obyektlarni qurish yoki rekonstruksiya qilish nazarda tutilgan bo‘lib, ijtimoiy obyektlarni tanlash jarayoni shaffof va ochiq o‘tkazilishini taʼminlash maqsadida loyihaga mahalliy nodavlat notijorat tashkilotlari ham jalb etilgan. Loyihaga oid ma’lumotlar hamda olib borilayotgan ishlar yuzasidan Loyihaning rasmiy veb-sayti, telegram va facebook kanallari, Iqtisodiy taraqqiyot va kambag‘allikni qisqartirish vazirligi rasmiy veb-sayti hamda bir qator boshqa bosma va elektron ommaviy axborot vositalarida doimiy ma’lumotlar berib borilmoqda.

O‘zbekiston Respublikasi Prezidentining 2022-yil 18-martdagi PQ-171-son Qaroriga asosan “Navoiy viloyati Karmana tumanida oqova suv tizimlarini qurish” hamda “Qashqadaryo viloyati Shahrisabz shahri va Kitob tumani markazida oqova suv tizimlarini rekonstruksiya qilish va qurish” loyihalari bo‘yicha olib borilayotgan ishlar yuzasidan “O‘zsuvta’minot” AJ hamda Fransiya Taraqqiyot agentligi bilan hamkorlik o‘rnatilgan bo‘lib, loyiha to‘g‘risidagi ma’lumotlar “O‘zsuvta’minot” Ajning rasmiy saytlarida e’lon qilib borilmoqda.

Loyiha doirasida Kitob tumani markazida istiqomat qiluvchi 53,7 ming nafar, Shahrisabz shahridagi 150,7 ming nafar aholining oqova suv ta’minoti yaxshilanadi.

Joriy yilning 25-mart kuni O‘zbekiston Respublikasi va Fransiya taraqqiyot agentligi o‘rtasida Qarz bitimi imzolandi. Bugungi kunda loyihani amalga oshirish guruhini tashkil qilish bo‘yicha ishlar olib borilmoqda.

Bo‘sh ish o‘rinlari https://uzsuv.uz/ru/vacant vа https://uzjobs.uz saytlarida e’lon qilindi.

O‘zbekiston Respublikasi Prezidentining 2022-yil 4-apreldagi PQ-189-son Qaroriga asosan “Milliy avtomobil yo‘llarini rivojlantirish” loyihasi doirasida Buxoro va Surxondaryo viloyatlarida umumiy qiymati 273,8 mln AQSh dollariga teng bo‘lgan avtomobil yo‘llarini rekonstruksiya qilish dasturlari ishlab chiqilgan.

Mazkur loyiha yuzasidan batafsil ma’lumotlar O‘zbekiston Avtomobil yo‘llari qo‘mitasining rasmiy veb-saytida joylashtirilishi ta’minlandi.

Agentlik tomonidan loyihalar doirasida ajratilgan mablag‘larning maqsadli ishlatilishi jarayonida ochiqlik va oshkoralikni ta’minlash ustidan nazorat ishlari davom ettiriladi.

Korrupsiyaga qarshi kurashish agentligi

Axborot xizmati